İrana qarşı yeni sanksiyalar - Rusiyaya görə

Avropa İttifaqı Rusiya Federasiyasının Ukraynaya qarşı işğalçı müharibəsinə dəstək verdiyi üçün İrandan olan şəxslər və şirkətlərə qarşı yeni məhdudlaşdırıcı tədbirlər tətbiq edib.

Xəbər verilir ki, bu barədə Aİ Şurasının saytında yerləşdirilən məlumatda deyilir.

“Aİ Şurası bu gün Rusiyanın Ukraynaya qarşı qeyri-qanuni müharibəsində istifadə olunan pilotsuz uçuş aparatlarının İranda hazırlanması və istehsalı ilə məşğul olan 6 nəfər və 5 şirkətə qarşı məhdudlaşdırıcı tədbirlər tətbiq edib”, - deyə, bəyanatda vurğulanır.

Bu, İranın Rusiyanın Ukraynaya qarşı işğalçılıq müharibəsinə hərbi dəstəyini nəzərə alaraq, məhdudlaşdırıcı tədbirlər üçün yeni yaradılmış hüquqi tənzimləməyə uyğun olaraq təsdiqlənən ilk sanksiya qərarlarıdır. Bu sanksiyalar İranın pilotsuz uçan aparatlarına qarşı artıq digər sanksiya rejimləri altında həyata keçirilən məhdudlaşdırıcı tədbirlərin əvvəlki dörd mərhələsini tamamlayır.

Xüsusilə, yeni sanksiyalar Shakad Sanat Asmari, onun icraçı direktoru, müavini və baş alimi, pilotsuz təyyarələr üçün komponentlər istehsal edən şirkətlərdən Baharestan Kish Company və onun direktoru Saad Sazeh Faraz Şərif , Sarmad Electronic Sepahan (aerokosmik mühəndislik xidmətləri göstərir), eləcə də, İslam İnqilabı Keşikçiləri Korpusuna dron proqramını təkmilləşdirməyə kömək edən digər şirkətlərə (xüsusən Kimia Part Sivan şirkəti) tətbiq edilib.

Bu şirkətlərin aktivlərinin dondurulacağı, eləcə də, liderlərinin Aİ-yə səfərinə qadağa qoyulacağı gözlənilir.

Habelə, sanksiyalar tətbiq olunan fiziki və ya hüquqi şəxslərə birbaşa və ya dolayı yolla vəsait və yaxud iqtisadi resursların verilməsi də qadağandır.

Becan.az