Saat almaq arzusu

Rövşən ŞİRALIYEV







Dörd illik tələbə həyatımda bircə dəfə mükafat gördüm. Keçmiş Lenin adına ADPİ-də keçirilən Respublika Tələbə Elmi Konfransında "Səməd Vurğunun dilçilik görüşləri" mövzusunda etdiyim məruzəyə görə ll yeri tutdum və institut Həmkarlar Komitəsi mənə 41 manat dəyərində "Luç" markalı saat hədiyyə etdi.

On beş il müddətində saat qolumda oldu, ta ki, bir dostum saatı "çırpışdırana" qədər. Sonra ancaq "kitayski" saatlarla zamanı yola verdim.

Telefon çıxandan sonra isə saatım yoxdu. İndi istəyirəm ki, bir saat əldə edim, amma daha "kitayski" olmasın. Xeyli düşündüm... Axır ki, bunun çarəsini tapdım...

Rəhmətlik Ömər Faiq müəllim yazır ki, Şamaxıda Hacı Əbdürrəhim əfəndi adlı birisi çox fikirləşəndən, yazıb-pozandan, ərk etdiyi üləmalara qol çəkdirəndən sonra, Rus çarına ərəb dilində dualar yazıb göndərir. Hacı dualarında xüsusi qeyd edir ki, o, bütün dünyadakı padşahlar içində ən əzəmətlisidir və geci-tezi, padşahların hamısı ona təzim edəcək, “cəmi müsəlmanların atası” kimi, onların duaları sayəsində, yüz illərlə ömür sürəcək... Və s...

Çar məktubu aldıqdan sonra, Hacı Əbdürrəhim əfəndiyə yekə bir qızıl saat bəxşiş göndərir. Hacı da həmin saatı hər yerdə qoynundan çıxararaq:

- Baxın, görün, bu saat “ələvü-əqdəs həzrət humayun”un bəndələrinə olan ehsan və mərhəmətidir, - deyərək, uşaq kimi sevinirmiş.

Ha indi mən də fikirləşirəm ki, Hacının məktubu-dəstgiri kimi, cənabi Putinə bir duali məktub göndərim. Onu tam arxayın edim ki, geci-tezi, bütün cahanın padşahı sən olacaqsan və Ərəbistandan tutmuş Tatarstana kimi, cəmi musəlmanlar sənə iki yüz il ömür arzulayırlar.

Ancaq bir əmma var ki, məktubu yazsam da, imzalatmaqda çətinlik çəkirəm. Deyirəm, birdən "ələvü-əqdəs həzrət humayun”un Putin mənə də bir "yekə qızıl saat" göndərdi, sonra onu necə böləcəm?.. Əvvəlki dövr deyil ki, təkbaşına saatı taxıb qoluma, gəzib lovğalanam, imza atanların da gərək könlünü görəm axı... Bu səbəbdən də məktub ilişib qalıb masamın üstündə!

Sən demə, çarənin özündə də bir çarəsizlik varmış...