Türk soylu məktəblilərin olimpiadası keçiriləcək

Türk İnteqrasiya Olimpiadası keçiriləcək.

Xəbər verilir ki, bilik yarışı Türk İnteqrasiya Olimpiadası (TİO) türk dövlətləri və milli qurumlarının məktəbliləri arasında baş tutacaq.

Olimpiada türk xalqlarının “Dildə, fikirdə, işdə birlik” şüarının fərqində olmalarını və gənclərin qardaş xalqların nümayəndələri ilə təhsil yolu ilə birləşməsini hədəfləyib.

TİO Fənlərin Dostluğu Olimpiadası (FDO) əsasında yaradılıb. FDO 2009-cu ildən "Hədəf Şirkətlər Qrupu"na daxil olan "Hədəf Nəşrləri" tərəfindən təsis edilib. 13 buraxılışı baş tutan FDO-da suallar inteqrativ formatda hazırlanır.

Belə ki, bir sualın şərtində və cavab variantlarında 2-5 fənnin inteqrasiyası öz əksini tapır. TİO-da hər sualda inteqrasiya olunacaq fənlərdən biri mütləq türk dünyasının coğrafiyası, ədəbiyyatı, tarixi, mədəniyyəti və ortaq elmi haqqında olacaq.

Olimpiadanın dörd əsas məqsədi var:

1. Türk xalqlarının ortaq dil, əlifba və dərsliklərinin ideyasına dəstək;

2. Türk dünyasında orta məktəb şagirdlərinin ortaq bilgisinin formalaşması və paylaşılması;

3. Türk xalqlarının yeniyetmələri arasında TİO vasitəsilə əməkdaşlığın qurulması;

4. Türk xalqlarının “İşdə, dildə, əməldə birliy”in fərqində olması və ortaq mədəniyyətə sahib olduqlarını əyani təqdim etməsi.

Olimpiada Azərbaycan, Türkiyə, Qazaxıstan, Qırğızıstan, Türkmənistan, QKTC, Tatarıstan, Krım, Qaraçaylar, Qaqauzya, Çuvaşıstan, Özbəkistan, Bolqarıstan, Başqırdıstan, Altay, Tuva, Saxa Yakutiya, Xakasiya, Qərbi Trakya, Uyğurstan, Güney Azərbaycan, Kərkük türklərini əhatə edəcək.

Olimpiadada bu şərtlərlə iştirak mümkündür:

1. Hər bir türkdilli ölkə öz seçim mərhələsini təşkil edəcək;

2. Seçim mərhələsində 40 %-dən çox nəticə göstərən şagirdlər finalda iştirak haqqı qazanacaq;

3. Hər komandanın rəhbəri olacaq;

4. TİO-nun son qeydiyyat günü olimpiadada 13 yaşı tamam olmuş və yaşı 16-dan çox olmayan məktəblilər iştirak edə biləcəklər.

TİO iki mərhələdə baş tutacaq:

1. Seçim mərhələsi (milli raund) – fevral – aprel ayları;

2. Final mərhələsi (qlobal raund) – may ayı.

Olimpiada iştirakçıları 20 sualı cavablandıracaq. Qiymətləndirmə isə sualların çətinlik dərəcəsinə görə aparılacaq:

1) 5 asan sual 4 bal;

2) 10 orta sual 5 bal;

3) 5 çətin sual 6 bal.

Maksimum bal 100-dür. İmtahan müddəti 60 dəqiqədir.

Əlavə məlumat üçün:

(+994) 77 220 03 02


Becan.az