İslam dininin şərtləri - ORUC

Əssələmu-aleykum!

Bundan əvvəlki yazılarımızda biz, İslam dinin iki şərtindən - Kəlmeyi şəhadətdən və Namazdan danışdıq. İndi isə İslamın növbəti şərti - ORUC haqqında qısa məlumat verəcəyik. Oruc İslam ümmətindən əvvəlki ümmətlərə də vacib buyurulmuş ibadətdir. Bunu Allahu-təalənin mübarək kitabı “Qurani-Kərim”də də görmək olar.

Necə ki, Uca Allah buyurur: «Ey iman gətirənlər! Oruc tutmaq sizdən əvvəlki ümmətlərə vacib edildiyi kimi, sizə də vacib edildi ki, (bunun vasitəsilə) siz pis əməllərdən çəkinəsiniz! (Oruc tutmaq) sayı müəyyən olan (bir ay) günlərdir. (Bu günlərdə) sizdən xəstə və ya səfərdə olanlar tutmadığı günlər qədər başqa günlərdə oruc tutmalıdırlar. Oruc tutmağa taqəti olmayanlar isə (hər günün əvəzində) bir yoxsulu doyuracaq qədər fidyə verməlidirlər. Hər kəs könüllü xeyir iş görərsə (həm oruc tutub, həm də fidyə verərsə), bu, onun üçün daha yaxşı olar. Bilsəniz oruc tutmaq sizin üçün nə qədər xeyirlidir! İnsanlara doğru yolu göstərən, bu yolu açıq dəlilləri ilə aydınlaşdıran və (haqqı batildən) ayıran (Quran) ramazan ayında nazil edilmişdir. Aya (ramazan ayına) yetişən şəxslər (bu ayı) oruc tutmalıdırlar; xəstə və ya səfərdə olanlar isə tutmadığı günlərin sayı qədər başqa günlərdə tutsunlar. Allah sizin üçün ağırlıq deyil, yüngüllük istər ki, fövtə gedən günlərin orucunu tamamlayasınız və sizi düz yola yönəltməsinə görə, Ona (“Allahu əkbər” - deməklə) təzim və şükür edəsiniz». (əl-Bəqərə: 183-185)

Eyni zamanda Orucun fəziləti haqında Peyğəmbərin (sallallahu aleyhi və səlləm) əshabəsi Əbu Hurayra belə rəvayət etmişdir:
Peyğəmbər (sallallahu aleyhi və səlləm) demişdir: «Uca Allah demişdir: Adəm övladının, orucdan başqa etdiyi hər bir əməl onun özünündür. Oruc mənimdir, mən də onun savabını verəcəyəm. Oruc, qoruyucudur. Sizlərdən kimsə oruc tutduğu gün, pis sözlər danışmasın, səsini yüksəldib, qəzəblənməsin və cahil əməlləri etməsin. Əgər kimsə onu söysə, yaxud onunla savaşmaq istəsə, iki dəfə, “mən orucam” – desin. Məhəmmədin canı əlində olana and olsun ki, oructutanın ağızından gələn iy, qiyamət günü Allah yanında misk (ən gözəl ətir) iyindən daha gözəldir. Oructutan iki dəfə sevinir: İftar edəndə yeməyinə sevinir, Rəbbi ilə qarşılaşdıqda isə tutduğu oruc ilə sevinəcəkdir». (Buxari: 4/ 118/ № 1904. Müslim: 2/ 807/ № 1151, № 1163. Nəsai: 4/ 163)

Allah bizi oxuyub faydalananlardan etsin, amin!

T. Saklı
Becan.az