İslam dininin şərtləri - KƏLMEYİ-ŞƏHADƏT

Lə iləhə illəllah

Əssələmu aleykum!

Əvvəlki yazımızda İslam dinin 5 şərtinin olduğunu qeyd etmişdik. Bu yazımızda həmin beş şərtin biri və birincisi olan “Əşəhədu ən lə iləhə illəllah və əşhədu ənnə Muhammədən abduhu və rasuluhu”dan yəni, Kəlmeyi-şəhadətdən danışacağıq. İlk öncə bunu bilməliyik ki, “Əşəhədu ən lə iləhə illəllah və əşhədu ənnə Muhammədən abduhu və rasuluhu” kəliməsinin Azərbaycan türkcəsinə mənaca tərcüməsi “Mən, şahidlik edirəm ki, Allahdan başqa ibadətə layiq Haqq, məbud yoxdur və Muhamməd onun qulu və elçisidir!” -deməkdir.

Gördüyümüz kimi, Kəlmeyi-şəhadət Allahın (Azzə və Cəllə) ibadətə layiq yeganə Haqq, məbud olduğunu və Muhammədin (sallallahu aleyhi və səlləm) Onun rəsulu olduğunu göstərərək iki şahidliklə tamamlandı. Bu yazımızda biz Kəlmeyi-şəhadətin birinci şahidlik tərəfini yəni, Kəlimeyi-Tövhidi oxucularımızla bölüşməyə və faydalanmağa çalışacağıq.

Kəlmey-Tövhid yəni, “Lə iləhə illəllah” kəliməsi özü iki hissəyə bölünür. Bu bölgü “İnkar” və “təsdiq” adlanır. Yəni, bu kəlimənin birinci hissəsi “Lə iləhə” - o deməkdir ki, “İbadətə layiq heç bir İlah, məbud yoxdur!”. “Lə iləhə”nin iqrarı ilə qul bütün ibadət olunanları inkar edir. Sonra isə Kəlmənin ikinci hissəsini yəni, “illallah” - “Allahdan başqa!” - deyərək, ibadətə layiq olan məbudun Allah olduğunu təsdiq etmiş olur.
Eyni zamanda “Lə iləhə illallah”ın özünün də 7 şərti vardır. “Lə iləhə illəllah”ın şərtləri aşağıdakılardır:

Elm (cahillikdən uzaq edir);

Yəqinlik (şübhələri yox edir);

Qəbul (inkarı yox edir);

Təslim (itaətsizliyi yox edir);

Sadiqlik (yalanı yox edir);

Məhəbbət (nifrəti aradan qaldırır) və

İxlas (yəni, səmimiyyət - bu da şirkdən uzaq edir).

Bir də, bu şərtləri misralara düzüb ədəbi dildə sizlərlə paylaşaq:

Cənnətin açarın tapdım insanlar!
Bu açar verəcək bizə girişi.
Açarın üstünə yazılıb “Tövhid”,
Həmçinin, var onun yeddi xır dişi.

Elm - cahillikdən uzaq saxlayar,
Elmsiz insanın qəlbi laxlayar.
Yəqinlik - şübhəni əridər qəlbdən,
Yəqinlik olmasa, qəlb pas bağlayar.

Qəbul et çəkinsin inkardan qəlbin,
Bil ki, Allahındır bu həqiqi din.
Təslim ol, boyun əy, itaət eylə,
Rəbbinin önündə, bi,l budur həddin.

Sadiq ol, yalanı öyrətmə dilə,
Rəbbin aman verməz, kəzzəb qafilə.
Məhəbbətlə yaxın qərar tut Ona,
Sevgini fərz elə, həm də nafilə.

İxlas ki, olmasa, bu əməllər heç,
İxlassız sayılan hər bir şeydən keç.
Qarşına qoyulsa dünyada hər şey,
Hər şeyə üz çevir, tək ixlası seç!

T.Saklı

Becan.az