Əvəz Zeynallının həyat yoldaşı etiraz aksiyası keçirib

Yanvarın 24-də həbsdə olan "Xural TV" internet televiziyasının rəhbəri Əvəz Zeynallının həyat yoldaşı Məlahət Qüsuri Baş Prokurorluğun İstintaq İdarəsinin binası qarşısında etiraz aksiyası keçirib.

Turan.az xəbər verir ki, o, jurnalistin 5 ay həbsdə olduğu müddətdə ailəsi ilə görüş və telefon danışığına qoyulan məhdudiyyətə etiraz etdiyini bildirib:
"Əvəz Zeynallı dövlət cinayəti törətməyib və ailəsi ilə görüşüb əlaqə saxlamaq onun təbii hüququdur".

Məlahət Qüsuri bütün sivil variantlara əl atdığını qeyd edib.

"Prezidentə müraciət etdim, ondan sonra Əvəz Zeynallı, mən ombudsmana müraciət etdik, onlar dedilər ki, mümkün qədər kömək edəcəklər, amma, görünür ki, bacarmırlar, dəfələrlə həm canlı efirdə, həm ərizə ilə yazırıq, amma cavab yoxdur. Düşünürdüm ki, Prezidentə müraciətdən sonra bu qadağalar aradan qalxacaq, çünki Əvəz Zeynallının həbsi qanunsuzdur, saxta ittihamlarla həyata keçirilib və ailəsi ilə görüşünün qarşısının alınması təzyiq üsuludur", - deyə, O, qeyd edib.

Jurnalistin həyat yoldaşı yenə Prezident İlham Əliyevə, Baş prokuror Kamran Əliyevə, Baş Prokurorluğun İstintaq İdarəsinin rəisi Nemət Eyvazova müraciət edərək, telefon danışığı və görüş qadağalarının aradan qaldırılmasını istəyib.

Məlahət Qüsuri həmçinin axtarış zamanı evlərindən götürülən və qızlarının təhsil haqqı üçün nəzərdə tutulan vəsaitin ailəsinə qaytarılması ilə bağlı göstəriş verilməsini istəyib.

Onun sözlərinə görə, Əvəz Zeynallının səhhətində ciddi problemlər var:
"Saxlandığı təcridxananın tibb müəssisəsində ona zəruri göz əməliyyatının aparılmaması üçün müxtəlif bəhanələr gətirilir və heç kəs məsuliyyəti öz üzərinə götürmək istəmir. O zaman müvafiq orqanlar Əvəz Zeynallının ev dustaqlığına buraxılıb, zəruri müayinəsi və əməliyyatı üçün lazımi addımları atmalıdırlar".

Məlahət Qüsuri bildirib ki, tələbləri yerinə yetirilməyənə qədər hər həftə İstintaq İdarəsinin binası qarşısında etiraz aksiyası keçirəcək.

O bildirib ki, Baş Prokuroprluğun Istintaq İdarəsinin rəis müavini Qasım Məmmədov tərəfindən qəbuil edilib.
"Qasım Məmmədov dedi ki, iki-üç gün müddətində qaldırdığım problemlə bağlı məsələyə baxılacaq", - deyə, jurnalistin həyat yoldaşı qeyd edib.

Xatırladaq ki, Vəkil Elçin Sadıqov və "Xural TV" saytının təsisçisi Əvəz Zeynallı 2022-ci il sentyabrın 10-da rüşvət almaqda şübhəli bilinərək saxlanılıblar, sentyabrın 11-də isə məhkəmə hər ikisini həbs edib.

Sentyabrın 17-də Bakı Apellyasiya Məhkəməsi Sadıqovu ev dustaqlığına keçirib.

Sonradan Zeynallıya qarşı CM-in 312-1.1-ci (vəzifəli şəxsin qərarına qanunsuz təsir göstərmə – nüfuz alveri) maddəsi ilə yenidən ittiham elan edilib. Dekabrın 29-da Zeynallının həbs müddəti 3 ay uzadılıb.

Becan.az