FHN-in itkin düşən əməkdaşının meyiti güllələnmiş halda tapıldı - YENİLƏNİB

Qusarda bir neçə gündür itkin düşən 43 yaşlı Ramik Əhmədovun meyiti tapılıb.

“Qafqazinfo” xəbər verir ki, R.Əhmədovun üzərində zorakılıq əlamətləri olan meyiti rayonun Hil kəndində aşkar edilib. Onun odlu silahdan açılan atəşlə öldürüldüyü bildirilir.

Məlumata görə, Ramik Əhmədov FHN-in Dövlət Yanğından Mühafizə Xidmətinin Qusar Rayon Şöbəsində işləyib.

Faktla bağlı cinayət işi açılıb, əməliyyat-axtarış tədbirləri həyata keçirilir.

***

Qusarda ötən gün meyiti tapılan 1981-ci il təvəllüdlü Ramik Radik oğlu Əhmədov əvvəllər Fövqəladə Hallar Nazirliyində (FHN) çalışıb.

Bu barədə FHN-in Mətbuat xidmətindən bildirilib.

Məlumata görə, o, öz arzusu əsasında vəzifəsindən azad olunub.

***

"Qardaşım srağagün öz iti ilə evdən çıxıb meşəyə gedib. Dünən güllələnmiş meyitini tapdıq. Bu gün torpağa tapşırılıb. Kimin güllələdiyini bilmirik, şübhələndiyimiz adam da yoxdur".

Bunu Oxu.az-a açıqlamasında Qusarda bir neçə gündür itkin düşən və dünən meyiti tapılan Fövqəladə Hallar Nazirliyinin (FHN) sabiq əməkdaşı Ramik Əhmədovun qardaşı Edik Əhmədov bildirib.

E.Əhmədov qeyd edib ki, qardaşının heç kimlə problem olmayıb:

"O, itini gəzdirməyə aparmışdı. Meşədə yerdən qazılmış, üstüqapalı ev var idi. Qardaşım orada güllələnib, amma meyiti yaxınlıqda tapılıb. İt isə sonradan özü gəlib evə. Ailə və dostları ilə münasibəti qaydasında idi".