Azərbaycanda biznes kreditlərinə maraq niyə artmır? - AÇIQLAMA

"İstehlak kreditləri yüksək faizlə verilir və bu da riskli kredit sayılır"

Azərbaycan Mərkəzi Bankının məlumatına görə, bu ilin II rübündə Azərbaycan əhalisinin borclanma səviyyəsi üzrə uzunmüddətli diffuziya indeksi əvvəlki illə müqayisədə dörd faiz bəndi artaraq 23 faiz təşkil edib.

Bu göstərici I rüb ilə müqayisədə isə iki faiz bəndi artıb. Respondent bankların 75 faizi əhalinin borclanma səviyyəsində dəyişiklik olmadığını, 25 faizi isə orta dərəcədə artım olduğunu bildirib.

Qeyd edək ki, əhalinin borclanma səviyyəsi üzrə uzunmüddətli diffuziya indeksinin ən yüksək göstəricisi 2022-ci ilin II rübündə (29%) olub.

İqtisadçı-ekspert Natiq Cəfərli bildirib ki, istehlak və ipoteka kreditləri cəmi kredit portfelinin təxminən yarısını təşkil edir və bu da beynəlxalq standartlara görə təhlükəli hesab olunur:


"İstehlak və ipoteka kreditlərinin cəmi kredit porfelinin üçdə biri qədər olması normal sayılır. Amma bu göstərici daha artıq olunca təhlükə və riksləri artırır. Digər problem də odur ki, ölkədə biznes kreditlərinə maraq artmır. Yəni cəmi kredit portfeli həcm olaraq artsa da, biznes kreditlərinin həcmi yüksəlmir. Bu da onu göstərir ki, biznes çevrələrinin kreditləşməsi hələ də problem olaraq qalır".

Ekspert vurğulayıb ki, şərtlərin ağır olması, o cümlədən faizlərin yüksək olması kreditə marağın azalmasına səbəb olur:

"Belə olanda da daha az iş yerləri, daha az müəssisələr açılır. Başqa sözlə, bu, iqtisadi aktivliyin təşviqi baxımından yaxşı hal deyil. Təhlükə ondan ibarətdir ki, əsasən də istehlak kreditləri yüksək faizlə verilir və bu da riskli kredit sayılır. Bu tendensiyanın müəyyən bank sektoru üçün təhlükəli olduğunu söyləməkdə yarar var. İstehlak kreditləri həcminin yüksək olması həm də inflyasiya yarada biləcək faktora çevrilir".

N.Cəfərli əlavə edib ki, ölkədə kredit portfeli o qədər də böyük deyil. Sadəcə, onun strukturunda istehlak və ipoteka kreditlərinin çox olması müəyyən təhdid və təhlükə yaradır.(Bakupost.az)