Fars rejiminin “dostluğu” erməni düşmənçiliyindən təhlükəlidir

Ağlım kəsəndən erməniləri ciddi düşmən saymamışam. Çünki ermənilər nə qədər fürsətbaz, kələkbaz, torpaqbaz və qəddar olsalar da, azdılar, zəifdilər, möhtacdılar. Onların əlinə dəyənək verən, arxalarından qabağa itələyən olmasa, Azərbaycan Xalqının, Türk Millətinin qarşısında müti bir qövmdilər. Onların əlinə dəyənək verənlərisə, millət olaraq, yüz illərdi yaxşı tanıyırıq – İran, Rusiya, Fransa... kimi işğalçı, təxribatçı rejim ölkələri! Əsrlər boyu biz humanistliyimizdən yorulmadıq, onlar xainliklərindən əl çəkmədilər!..

Hazırda Rusiyanın Qarabağdakı “erməni dayılığı”, Fransanın, ABŞ-ın “erməni hamiliyi”, İranın “erməni sevgisi”, məncə, bizdə təəccüb doğurmamalıdır. Bu, birinci-üçüncü-beşinci dəfə deyil axı, mininci, milyonuncu dəfədir! Bizim ən çox ehtiyatlanmalı olduğumuz ölkələr də, məhz, hayları dəmləyib-yemləyib, üstümüzə qısqırdanlardır!

Fars rejimləri tarixən Türkün düşməni olub. Qırx milyonluq soydaşımızı iki yüz ilə yaxındır əsarət altında saxlayıb, dilini, adət-ənənəsini, maddi-mənəvi-tarixi dəyərlərini məhv eləməklə məşğuldu! Buna nə dərəcədə nail olub, bu, ayrı mövzudu. Fakt - İran adlanan məmləkətin siyasi rejimi əsrlərdi bizimlə düşmən mövqedədir! Qarabağ savaşlarında İran hakimiyyəti, hərtərəfli olaraq, Ermənistana gizli və aşkar şəkildə köməkliklər göstərib. Bir ay əvvəl İran ordusu, Zəngəzur dəhlizinin açılmaması naminə, sərhədlərimizin demək olar üstündə, Azərbaycana güc nümayiş elətdirirdi. Bu, həm də o deməkdir ki, fars rejimi ən azından Cənubi Azərbaycan faktoruna görə, heç vaxt bizə dost, erməniyə düşmən olmayacaq!

Tarixi nəticələrə rəğmən, bu gün İranın mərkəzində Azərbaycan səfirliyinə silahlı basqın olması, səfirlik mühafizəsinin qətlə yetirilməsi bizdə təəccüb doğurmamalıdır. Dörd aydır İranda baş verən haqlı xalq narazılığını yatırmaq məqsədilə, qoca-cavan-qadın-uşaq bilmədən, öz əhalisinin boğazına kəndir keçirdib, dar ağacından asan insanlıq cinayətkarı olan bir siyasi rejim, əlbəttə, düşmən bildiyi bir ölkənin nümayəndələrini, gözünü qırpmadan, güllələyər də, imkanı olsa, ət maşınından da keçirdər! Gözünü qan pərdələmiş bir rejimdən adi insanlıq keyfiyyəti gözləmək, sadəlövhlük olar.


Əlbəttə ki, dövlətmizin siyasət yönəticiləri acımasız terror aktına görə, molla rejiminə gərəkən siyasi təpgiləri göstərir, notalar göndərir, caninin layiqli cəzasına çatdırılmasını tələb eləyir və bunlar, yəqin ki, son nəticəyə qədər səngiməyəcək. Amma, fikrimcə, diplomatik məkanı qoruyan Azərbaycan oğlunu qətlə yetirən qatil Azərbaycan dövlətinin mühakiməsinə verilməlidir, - əgər bu qanlı cinayətdə İran hakimiyyətinin doğrudan da əli yoxdursa! Ən yaxşı halda, məhrumiyyətlərə görə hakimiyyətə etiraz eləyən insanların boğazına kəndir keçirdən molla rejimi, səfirliyimizə silahlı basqın eləyən qatili dərhal və aşkarcasına dara çəkməlidir. Və bunu tələb etmək Azərbaycanın haqqıdır, çünki səfirlik ərazisi təmsil etdiyi ölkənin ərazisi sayılır. Bu mənada, İran vətəndaşı ölkəsi adından Azərbaycana soxulmuş və qanlı cinayət törətmiş sayılır.

Qatilin əlində Rusiya istehsalı olan “kalaşnikov” avtomatının olması isə, məncə, iz azdırmaq, məsuliyyəti uzaqlaşdırmaq məqsədi daşıyır. Çünki, inandırıcı görünmür ki, Rusiya İranla Azərbaycan arasındakı onsuz da soyuqlaşmış münasibətləri daha da gərginləşdirmək məqsədilə açıq hədəfdən istifadə eləsin. Rusiyanın katalizatorluğu bunca sadə olmaz.

Azərbaycan açıq düşmən mövqeyində duran fars rejimi ilə bütün əlaqələri kəssə, düşünürəm ki, yerinə düşər və çox şey itirməz. Heç olmasa, gözlənilməz təhlükələrdən və narkotik vasitələrin gizli yollarla ölkəmizə soxuşdurulmasından bir qədər uzaq olarıq. İndiki durumda İran “kor ilan” qədər təhlükəli görünür!