Cəzalı futbolçu növbəti oyuna buraxıldı və qol vurdu - AZƏRBAYCANDA

Azərbaycan futbolunda növbəti biabırçılıq

Region Liqasında fevralın 5-də keçirilən “Difai” – “Çinar Zəngilan” oyununda meydan sahiblərinin iki futbolçusu – Gülalı Mehrəliyev və Fərid Bədəlov hakimi təhqir etdiklərinə görə İntizam Komitəsi tərəfindən 4 oyunluq cəzalanıblar.

Ancaq çox təəccüblüdü ki, Gülalı artıq fevralın 11-də keçirilən “Difai” – “İrəvan” matçında meydana çıxıb. Bəs bu necə olub?

Məsələ ilə bağlı “Football-plus.az"a açıqlama verən “İrəvan”ın nümayəndəsi Alı Alıyev Azərbaycan futbolunda yaşanan növbəti biabırçılıq barədə bunları söylədi:

“İntizam Komitəsi Həm Gülalını, həm də Fəridi “Çinar Zəngilan”la matçda hakimi təhqir etdiyinə görə 4 oyunluq cəzalandırıb. Ancaq bir həftə sonra “İrəvan”la oyunda Gülalı meydana çıxır və bizə qol vurur. Əlimizdə şəkillər və videolar var. Məsələ ilə bağlı aidiyyatı qurumlara müraciət edib, başverənlərə aydınlıq gətirmələrini istəmişik. Apellyasiya Arbitraj Tribunalının rəhbəri Ziya Babayev absurd qərar verib. O futbolçuların cəzasını qüvvədə saxlasa da, “Difai”yə texniki məğlubiyyət verilməsinə qarşı çıxıb.

Bu günə kimi futbolda belə hal yaşanmayıb. Bu olayla bağlı AFFA-da bir çoxları ilə danışmışam. Rüstəm Rəhimov, Vaqif Sadıqov, Məlik Həsənov kimi illərini futbola verən hörmətli şəxslər belə bunun düzgün olmadığını bildirdilər. Komanda cəzalı futbolçunun xidmətindən yararlanırsa, cəzalanmalıdı. Ziya Babayevi tapmaq, onunla əlaqə saxlamaq qeyri-mümkündü. Bu adam kimdisə, telefon nömrəsini belə tapmaq müşkülə çevrilib. Biz absurd qərarla razılaşmırıq.

Ümumiyyətlə, AFFA-da çalışanlar, komitə sədrləri klubların haqqını qorumalıdı. Xeyli vaxt idi assosiasiyaya getmirdim. Bu məsələ ilə bağlı bugünlərdə ora baş çəkdim. 5-6 nəfərdən başqa heç kimi tanımadım. Mənə elə gəlir ki, hazırda AFFA-da işləyənlərin sayı çempionatda çıxış edən yerli oyunçuların sayından çoxdur”.

“İrəvan”ın prezidenti Zahid Niyazəliyev isə bunları bildirdi:

“Difai”nin bu addımı ilə bağlı şikayət etmişik. Adını qeyd etdiyim klubun rəhbərliyi AFFA-ya gedərək Şuşanı təmsil etdiklərini, qazilər komandası olduqlarını deyib hay-küy salıblar. Ondan sonra belə biabırçılıq yaşanıb. Bizim komandada 6 qazi oynayır, rəhbərlikdə şəhid ailəsi olan da var. “Difai” rəsmiləri qazi adından sui-istifadə edir. Ölkə başçımız şəhid ailələrinə, qazilərə yetərincə diqqət göstərir, onların problemlərini vaxtında həll edir. Ancaq futbolda bu imtiyazdan istifadə edib qanunsuzluğa yol vermək düzgün deyil. Məsələ ilə bağlı çox mütəxəssisin mövqeyini öyrənmişik. Hamı bizim haqlı olduğumuzu söyləyir”.