Həyat şeirdir - şeir həyatdır

İndi "Mirzələr" çoxdur, "Sakit"indən bir dənədir

Dahi şairlərlər yurdunun "zəmanə mirzəsi" - qürbət həyatı yaşamağa məcbur olan, şamaxılı şair Mirzə Sakitin həqiqət yüklü satirik şeirlərindən birini oxucularımıza təqdim edirik.

"CAN NƏNƏ"

Həə!.. Qalxaydım sabah-sabah obaşdan,
Nənəm çəkə isti-isti o xaşdan,
Dürmələyib pendir ilə lavaşdan,
Bardaş qurub, şirin-şirin yeyəydim,
Qadooyalım, sağ ol, nənə! - deyəydim.

Anam düzə balıq, qaymaq, yağ, yuxa,
Dədəm bərkdən balıq üstə nar sıxa...
Samavarın lüləyindən buğ çıxa;
Boşaldıqca samavarı əyəydim,
Qadooyalım, sağ ol, nənə! - deyəydim.

Nənəm gülüb deyəydi: - Ay Əjdahaaa!
Yedün, doyduuun?!. Sən Allah, dur, get daha!
Gedəndə də, qaloşumu geymə haaa!.. -
Qucaqlayıb üz-gözündən öpəydim,
Qadooyalım, sağ ol, nənə! - deyəydim.

Evdən çıxıb, qayıdaydım tez yenə,
Deyəydim ki, əlli köpük ver mənə, -
İndeyski kino gəlib, ay nənəəəə!..
Sərt baxanda, gözlərimi döyəydim,
Qadooyalım, sağ ol, nənə! - deyəydim.

Bacım gəlib çimdikləyə qolumdan,
Qardaşım da qıdığlaya solumdan,
Nənəm hirslə təpik vura dalımdan,
Ağzı üstə qalxıb yerə dəyəydim,
Qadooyalım, sağ ol, nənə! - deyəydim.

M.S.

BECAN.AZ