Azərbaycan XİN: "Paşinyanın etnik təmizləmə barədə iddiaları cəfəngiyyatdır"

Laçın yolunda sərhəd-nəzarət məntəqəsinin yaradılmasının "etnik təmizləmə" məqsədini güdməsi barədə Ermənistanın baş naziri Nikol Paşinyanın fikirləri qəbuledilməz və absurddur. Bu barədə Ermənistan hökumətinin bugünkü iclasında Paşinyanın verdiyi bəyanata cavab olaraq, Azərbaycan Xarici İşlər Nazirliyinin şərhində deyilir.

“Azərbaycanın öz suveren ərazisində sərhəd nəzarət-buraxılış məntəqəsi təsis etməsi məsələsinə Ermənistan tərəfinin hər hansı bir müdaxiləsi Azərbaycanın suverenliyi və ərazi bütövlüyünə qarşı iddiadır, Ermənistanın Praqa və Soçidə öz üzərinə götürdüyü öhdəliklərə, eləcə də beynəlxalq hüququn bütün norma və prinsiplərinə ziddir.

Ermənistan tərəfinin bu kimi bəyanatları bölgədə sülh və əmin-amanlığa töhfə verməməklə yanaşı, qəsdən gərginliyin artırılması məqsədi daşıyır”, - Azərbaycan Xarici İşlər Nazirliyi qeyd edir.

44 günlük müharibədən sonra üçtərəfli bəyanatın müddəalarına zidd olaraq, Ermənistan Laçın yolundan qanunsuz fəaliyyət, döyüş sursatı və minaların daşınması üçün istifadə edib, Ermənistan silahlı qüvvələrinin Azərbaycan ərazisindən tam çıxarılmasını təmin etməyib.

Sərhəd məntəqəsinin yaradılması Ermənistan tərəfindən təxribatların, bu qanunsuz fəaliyyətin qarşısının effektiv alınmasına xidmət edəcək.

“Yola sərhəddən giriş-çıxış rejimini tənzimləyəcək bu məntəqənin təsis edilməsinin yolun bağlanması kimi qiymətləndirilməsi tamamilə yanlışdır”, - şərhdə deyilir.

Digər tərəfdən, Azərbaycan Laçın yoluna səlahiyyət və suveren hüquqlara malikdir və öz öhdəlikləri çərçivəsində vətəndaşların, nəqliyyat vasitələrinin və yüklərin təhlükəsizliyinə zəmanət verir.

“Sərhəd nəzarət-buraxılış məntəqəsinin təsis edilməsinin “etnik təmizləmə” məqsədi güddüyü barədə baş nazirin cəfəng iddiası qəbuledilməzdir. Məntəqədən Azərbaycan Respublikasının Qarabağ bölgəsinin yerli erməni sakinlərinin hər iki istiqamətdə şəffaf, təhlükəsiz və nizamlı keçidi üçün müvafiq şərait mövcuddur”, - şərhdə vurğulanır.

Paşinyanın Laçın yoluna beynəlxalq faktaraşdırıcı missiya göndərilməsinin, erməni sakinlərlə Bakı arasında dialoqun beynəlxalq mexanizmlərinin vacibliyi haqda bəyanatlarına gəlincə, Azərbaycan tərəfi erməni sakinlərlə dialoqu ölkə qanunvericiliyi çərçivəsində həyata keçirəcək və üçüncü tərəflərin bu məsələyə müdaxiləsi qəbuledilməzdir.

“Ermənistan tərəfini əsassız bəyanatlar vermək əvəzinə, ötən ilin dekabrından bəri imtina etdikləri sülh sazişi üzrə danışıqlara məsuliyyətlə və konstruktiv yanaşmağa çağırırıq.

Kommunikasiyaların açılması, öz qüvvələrinin Azərbaycan ərazilərindən tam çıxarılması daxil olmaqla, üçtərəfli bəyanatdan irəli gələn öhdəliklərə riayət etməyi, Azərbaycanın ərazi bütövlüyü və suverenliyinə qarşı addımlardan çəkinməyə çağırırıq”, - Azərbaycan Xarici İşlər Nazirliyinin şərhində deyilir.

Becan.az