"Çek almağa pulum yoxdur, həkim qəbuluna düşə bilmirəm" - 26 saylı poliklinikadan şikayət

Bakı şəhəri, Nizami rayon sakini Gülbala Abdullayev 26 saylı Şəhər Poliklinikasından şikayətçidir.

Bu barədə şikayətçi Gülbala Abdullayev özü mətbuata açıqlama verib.

Onun sözlərinə görə, çek almadığı üçün həkim qəbuluna düşə bilmir:

"Poliklinikada belə qayda var, həkim qəbuluna düşmək üçün 20 manat ödəyib, sonra çek almalısan. Bütün xəstələr belə edir. Amma mənim pulum yoxdur. İmkanım çatmır deyə, qəbul etmirlər. Hər dəfə çek almaq üçün yaxınlaşanda, deyirlər ki, komputer işləmir. Bu poliklinikanın anam və həyat yoldaşımın ölümündən də xəbəri olmayıb. Yoldaşım 9 il onkoloji xəstəlikdən əziyyət çəkib. 5 ildir vəfat edib. Heç birindən xəbərləri yoxdur. Özüm də 2-ci qrup əliləm”.

Gülbala Abdullayev çekin verildiyi şöbənin rəisindən narazılığını da ifadə edib:

“Çek verən şobənin rəisi Vüsalə adlı xanımdır. O, sanitar idi. Birdən-birə gəlib bu vəzifəni tutub. Vüsalə xanım baş həkim Aidə xanımın yanında mənə dedi ki, get, hara istəyirsən, şikayət et, Bakı Baş Səhiyyə Mərkəzindən Aysel xanım mənim arxamdadır. Baş həkim Aidə xanım onlarla başa çıxa bilmədiyini deyir. O, bildirir ki, hər tibb bacısının bir adamı var, zəng edib tapşırtdırır”.

Şikayətçi, məsələ ilə bağlı müvafiq qurumlara müraciət etsə də, ona cavab verilməyib:

"Bakı Baş Səhiyyə Mərkəzində 4, TƏBİB-də isə 1 dəfə olmuşam. Məni yola verdilər. Srağagün hər iki quruma elektron qaydada müraciət etdim. Səhiyyə Nazirliyinə də müraciət etmişəm. Cavab yoxdur. 1 həftə də gözləyəcəm, nəticə olmasa, Mehriban Əliyevaya müraciət edəcəyəm. Hər şeyi sübut edə bilərəm”.

Məsələ ilə bağlı 26 saylı Şəhər Poliklinikası ilə əlaqə saxlamağa çalışsaq da, zənglərimizə cavab verən olmadı.(Bakupost.az)

Qarşı tərəfləri də dinləməyə hazırıq(red.).