Tofiq Yaqublu xəstəxanaya yerləşdirilib

Musavat fəalınin sağlamlıq vəziyyətinin kritik olduğu bildirilir

Bu gün həkim Adil Qeybulla təcridxanada Tofiq Yaqublu ilə görüşüb və onun səhhətini nəzərə alaraq, xəstəxanaya köçürülməsinin vacibliyini vurğulayıb.

2022-ci ilin dekabr ayının 23-də İnzibati Xətalar Məcəlləsinin 510-cu maddəsi (xuliqanlıq) əsasında 30 sutkalıq inzibati qaydada həbs olunan Musavat Partiyasının və Milli Şuranın üzvü Tofiq Yaqublu ilə bu gün həkim Adil Qeybulla təcridxanada görüşüb. Həkim Adil Qeybulla mümkün müaiyənədən sonra, Tofiq Yaqublunun sağlamlıq vəziyyətinin son dərəcə kritik olduğunu və təzyiqinin 80-60-a düşdüyünü bildirib. Oturub-qalxanda başgicəllənmələri olduğunu, özünü çox halsız hiss etdiyini, hər an vəziyyətində geridönməz halların baş verə biləcəyini nəzərə alan həkim, Tofiq Yaqublunun dərhal xəstəxanaya köçürülməsini vacib bilib və mövcud vəziyyətlə bağlı Daxili İşlər Nazirliyinə müraciət olunub.

Bu barədə Tofiq Yaqublunun qızı Nigar Həzi feysbuk hesabında məlumat verib. O, əvvəlcə Daxili İşlər Nazirliyi ilə Tofiq Yaqublunun hansı xəstəxanaya köçürülməsiylə bağlı danışıqlar aparıldığını, bir müddət sonra isə artıq xəstəxanaya yerləşdirildiyini paylaşıb: “Biz istəyirik ki, Tofiq Yaqublu güvəndiyimiz həkim Adil Qeybullanın müşahidəsi altında olsun... Buna görə də Tofiq Yaqublunun “City Hospital”a köçürülməsini, eyni zamanda, TƏBİB-in Tofiq Yaqublunun icbari tibbi sığortasından istifadə edərək, xəstəxana xərclərini qarşılamasını təkid edirik”.

“Tofiq Yaqublu Bİnəqədi rayonunda yerləşən 6 saylı Məlikov adına xəstəxanaya yerləşdirilib. Hal-hazırda xəstəxanadayıq. Atayla görüş üçün müraciət etmişəm. Cavab gözləyirəm. Bildiyim qədəriylə Tofiq Yaqublu aclığı dayandırmayıb”, - deyə, Nigar Həzi açıqlama yayıb.

Qeyd edək ki, Tofiq Yaqublunun yanvarın 5-dən etibarən aclıq aksiyasına başladığı bildirilir.

BECAN.AZ