"Bu gün Azərbaycan Demokratiya və Rifah Partiyası İdarə Heyətinin təşəbbüsü ilə şərlənərək həbs olunan sədrimiz Qubad İbadoğlunun Hüquqlarını Müdafiə Komitəsini yaratdıq. Müdafiə Komitəsinin tərkibi 21 nəfərdən ibarətdir. Komitəyə Cəmil Həsənli rəhbərlik edəcək".Bunu ADRP-nın İdarə Heyətinin üzvü Ədalət Yusub bildirib.
Onun sözlərinə görə, Müdafiə Komitəsində 3 istiqamətdə işçi qrupları yaradılacaq:
"İctimaiyyətlə əlaqələr, beynəlxalq və hüquqi istiqamətləri üzrə işçi qrupları formalaşdırılacaq. Komitənin qəbul etdiyi təlimatları həmin qruplar üzrə yönləndirməyə çalışacağıq. Mütəmadi olaraq fəaliyyət göstərəcəyik. Ümid edirik ki, İbad bəyin hüquqularını tam şəkildə müdafiə edərək, onu üzərinə qoyulmuş saxta ittihamdan qurtara, zamanından əvvəl azadlığa çıxara biləcəyik".Ə.Yusub Müdafiə Komitəsində Cəmil Həsənlinin, Mehman Əliyevin, Tofiq Yaqublunun, Rafiq Manaflının, Rüfət Muradlının, Nuridə Quliyevanın, Əlövsət Sadıqlının, Arif Şahmalıoğlunun, Azər Qasımlının, Rüfət Səfərovun, Zəfər Əhmədovun, Ələsgər Məmmədlinin və digər şəxslərin təmsil olunduğunu bildirib:
"Müraciət edənlərin sayı həddindən artıq çoxdur. İlkin mərhələdə 35 nəfər müraciət etmişdi. Hələ ki, 21 nəfəri razılaşdırıb Müdafiə Komitəsinə qəbul etdik. Müzakirələrdən sonra kimlərsə tərkibə daxil ediləcəksə, ictimaiyyətə məlumat veriləcək".(Bakupost)