Türkiyədə gizli Qarabağ müzakirəsi...

ABŞ, Avropa İttifaqı və Rusiyanın yüksək səviyyəli rəsmiləri Azərbaycanın lokal antiterror əməliyyatlarından bir neçə gün əvvəl Qarabağdakı vəziyyətlə bağlı Türkiyədə gizli danışıqlar aparıblar.

Bu barədə "Politico" nəşri yazıb.

Yazıda qeyd olunur ki, bu görüş Ukraynada müharibə başlayandan bəri Moskva ilə Qərb arasında mühüm təhlükəsizlik problemi ilə bağlı nadir, son nəticədə uğursuz təmasdır.
Müzakirələrdən məlumatlı olan yüksək səviyyəli diplomat "Politico"ya bildirib ki, görüş sentyabrın 17-də İstanbulda "Qarabağın doqquz aylıq blokadasına son qoyması və Ermənistandan gələn humanitar yardım karvanlarının keçməsinə icazə verməsi üçün Azərbaycana təzyiq cəhdləri çərçivəsində" baş tutub. Onun sözlərinə görə, görüşdə "lənətə gəlmiş yük maşınlarının necə hərəkət etdirilməsi, ərzaq və yanacaq təchizatının 100.000 sakinə çatmasını təmin etmək" müzakirə edilib.

ABŞ-ı danışıqlarda Lui Bono - Vaşinqtonun Qafqazla danışıqlar üzrə baş müşaviri təmsil edib, Aİ isə görüşə xüsusi elçisi Toivo Klaarı göndərib. Rusiya isə danışıqlara Ermənistanla Azərbaycan arasında əlaqələr üzrə Rusiya Federasiyasının xüsusi nümayəndəsi olan İqor Xovayevi göndərib.

"Politico"ya verdiyi açıqlamada, AB rəsmisi "anlaşılmazlıqların qarşısını almaq üçün müvafiq həmsöhbətlərlə əlaqə saxlamağın vacib olduğuna inanırıq" deyib. O, həmçinin qeyd edib ki, Klaar “son illərdə” bir çox cəbhələrdə, o cümlədən Xovayev və Rusiya xarici işlər nazirinin müavini Mixail Qaluzinlə əlaqələri saxlamağa çalışıb.

ABŞ Dövlət Departamentinin sözçüsü görüşlə bağlı şərh verməkdən imtina edərək, “biz özəl diplomatik müzakirələri şərh etmirik” deyib.

Bununla belə, məsələdən xəbərdar olan ABŞ rəsmisi bildirib ki, müzakirə zərurəti Kremlin bölgədə vəziyyətə nəzarətini saxlamasından irəli gəlib.

“Biz bu məsələdə ruslarla işləmək imkanına malik olmalıyıq. Çünki onların xüsusən də indiki təhlükəli məqamda tərəflərə təsir imkanı var”, - ABŞ rəsmisi bildirib.