Elektron resept neqativ hallara yol aça bilər - Ekspertlər

Xəbər verildiyi kimi, yanvarın 1-dən etibarən ölkədə elektron resept sisteminin tətbiqinə başlanılıb. Bu, “Dərman vasitələri haqqında” qanuna edilən dəyişiklikdə əksini tapıb.

Mövzu ilə bağlı danışan iqtisadçı ekspert Eyyub Kərimli bildirib ki, yeni elektron resept sisteminin tətbiqi dərmanların bahalaşmasının qarşısının alınmasına müəyyən qədər təsir göstərəcək:


"Ölkəyə keyfiyyətsiz dərmanlar gətirilməsinin qarşısı alınacaq. Digər tərəfdən, bu yeniliyin idarəetmənin təkmilləşdirilməsi və şəffaflığın artırılmasına təsirləri olacaq. Həkimlərin işi isə daha da təkmilləşəcək. Həmçinin onlar reseptləri nəzarət altında saxlayacaq".

Tibb üzrə ekspert, professor Adil Qeybulla hesab edir ki, elektron resept icbari tibbi sığorta çərçivəsində dərman maddələrinin dövriyyəsinə nəzarət, onların sərfiyyatı, sərf olunan dərman maddələrinin miqdarı baxımından önəmli bir prosesdir. Bu, həkimlərin fəaliyyətinə nəzarət, yazılan reseptlərin qeydə alınması baxımından əhəmiyyətlidir. Lakin dərman monopoliyası, həkimlərin firmalarla razılaşması kimi problemlərin həlli üçün bu dəyişiklik bir o qədər effektiv deyil:


“Əksinə, bu dəyişiklik aptekdə işləyən şəxslərə imkan verəcək ki, onlar hər hansı bir firma ilə əməkdaşlıq edib, müştərilərə onların dərmanlarını təklif etsin. Yəni indiyədək ictimaiyyətdə narahatlıq doğuran məqam həkimlərin korporativ maraqları idi, bundan sonra isə əczaçıların bu qərardan sui-istifadə edib-etməməsi narahatlıq doğuracaq. Deməli, problemin birdəfəlik həlli üçün kompleks addımlar atılmalıdır”.(Bakupost.az)