Rəqabət Məcəlləsinin qəbulu inhisarın qarşısını alacaq - Ekspert

Xəbər verildiyi kimi, Prezident İlham Əliyev "Rəqabət Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında" qanunu təsdiqləyib.

Rəqabət Məcəlləsi bazarda hökmran mövqedə olan təsərrüfat subyektlərinin inhisarçı meyillərinin qarşısının alınmasının, kartel tipli əlaqələrin müəyyən edilməsinin, təbii inhisarların fəaliyyətinə səmərəli nəzarətin təşkilinin, haqsız rəqabət hallarının aradan qaldırılmasının və dövlət rəqabət nəzarətinin effektiv təşkilinin hüquqi bazasını özündə ehtiva edir. Rəqabət Məcəlləsi 2024-cü il iyulun 1-dən qüvvəyə minəcək.

Millət vəkili, iqtisadçı-ekspert Vüqar Bayramov deyib ki, məcəllənin qəbulu ilə "Antiinhisar fəaliyyəti haqqında", "Haqsız rəqabət haqqında", "Təbii inhisarlar haqqında" qanunlar və digər hüquqi aktlar yeni, vahid hüquqi sənəddə birləşdirilib. Layihə Türkiyə, ABŞ, Avropa İttifaqı, Almaniya, Avstriya, Latviya, Litva, Macarıstan və Çexiya qanunvericilikləri başda olmaqla, qabaqcıl beynəlxalq təcrübə, həmçinin yerli bazarın xüsusiyyətləri nəzərə alınmaqla ərsəyə gətirilib.

Millət vəkili vurğulayıb ki, məcəllənin qəbul edilməsində əsas məqsəd inhisarın qarşısının alınmasıdır:

“Sənədin qəbulu inhisarın minimumlaşdırılması, qiymətlərin optimallaşdırılması və hətta, bəzi məhsullar üzrə qiymətlərin azaldılması üçün yeni imkanlar yaradacaq”.

Vüqar Bayramovun dediyinə görə, bu gün ölkədə inhisarın aradan qaldırılması və bazarın liberallaşdırılması çox vacibdir. Bu baxımdan Rəqabət Məcəlləsinin qəbulu inhisara qarşı mübarizə, qiymətlərin optimallaşdırılması və bir sıra məhsullar üzrə qiymətlərin azadılmasına xidmət etməsi baxımından əhəmiyyətlidir:

“Bu gün bütün inkişaf etmiş ölkələrdə bu istiqamətdə qanunvericilik var. Avropa İttifaqında ən vacib qanunlardan biri də rəqabət ilə bağlı qanundur. Ona görə də Rəqabət Məcəlləsinin qəbul edilməsi nəticədə Azərbaycanın iqtisadiyyatında rəqabətin daha yaxından dəstəklənməsində, inhisara qarşı mübarizənin gücləndirilməsində xüsusi paya malik olacaq".(Bakupost.az)