Azərbaycandan başqa, heç bir ölkədə karantin rejimi yoxdur - Ekspert
İqtisadiyyat
14:57
6.04.2024
1 029
“Azərbaycan ərazisində xüsusi karantin rejiminin iyulun 1-dək uzadılmasını düzgün qərar hesab etmirəm. Hazırda dünyanın heç bir yerində karantin rejimi yoxdur. Ümumdünya Səhiyyə Təşkilatı bununla bağlı bütün protokol və tövsiyələri ləğv edib. Azərbaycan hökuməti illər əvvəl karantin rejimi ilə bağlı qərar verərkən, məhz həmin protokollara istinad etmişdi. Ona görə də hökumətin hələ də təkidlə "karantin var" deməsi inandırıcı deyil. Aydın məsələdir ki, ortada başqa məsələlər var".
Bu fikirləri KİV-ə açıqlamasında iqtisadçı ekspert Natiq Cəfərli deyib.
O bildirib ki, sərhəddə məhdudiyyətin saxlanmasının başlıca səbəblərindən biri ölkədən valyuta çıxışının qarşısını almaqdır. Onun fikrincə, bu da çox yanlış bir yoldur və iqtisadi aktivliyə mənfi təsir göstərir:
“Azərbaycanın, karantin rejiminə əsaslanaraq, quru sərhədlərini bağlı saxlaması ölkə iqtisadiyyatına və turizmə çox böyük ziyan vurur. Azərbaycan iqtisadiyyatı keçən il MDB-də ən aşağı göstəricilərə malik olub. Ümumi daxili məhsul isə 1 faiz civarında artıb. Bunun əsas səbəblərindən biri də quru sərhədlərin bağlı qalmasıdır. Son iki ilə nisbətdə 2019-cu ildə ölkəyə 2 dəfədən çox turist gəlib və onların xərclədikləri pul dəfələrlə çox idi. Bu da onu deməyə əsas verir ki, karantin rejiminin uzadılması iqtisadiyyata külli miqdarda ziyan vurur. İnkişafın qarşısında duran ən böyük maneələrdən biri neçə ildir ki, bağlı olan quru sərhədlərdir. Bu problem həll olunsa, ölkənin turizm sənayesi daha yaxşı inkişaf edər. Azərbaycanda bir yandan turizmi prioritet elan edib, digər yandan bu sahəni boğmaqla məşğuldurlar. Quru sərhədi bağlı olan ölkədə turizm inkişaf edə bilməz. Qonşu ölkələrin statistikasına nəzər yetirəndə Azərbaycan turizminin geridə qaldığını görürük. Buna səbəb ölkəyə turist gəlişinin yox səviyyəsində olmasıdır".
Becan.az
Oxşar xəbərlər
