Brüsseldə Ermənistanın Azərbaycanla sülh sazişi barədə heç nə deyilmədi - Ekspert

"ABŞ dövlət katibi Entoni Blinken və digərləri Brüsseldəki ortaq açıqlamalarında Ermənistanın Azərbaycanla sülh sazişi imzalamasının vacibliyi barədə heç nə demədilər".

Bunu Bürssel görüşünün nəticələrini şərh edən politoloq Elxan Şahinoğlu bildirib.

Onun sözlərinə görə, təəssüf ki, onlar Brüsseldə Paşinyanın “Sülh qovşağı” ideyasına dəstək verdiklərini söylədikləri halda, Prezident İlham Əliyevin daha geniş “Qafqaz evi” ideyasına münasibət bildirmədilər:

"Lyayen onu da bildirdi ki, Ermənistanın Qara dənizdən sualtı kabel vasitəsilə Avropaya təmiz enerji nəqlində maraqlıdırlar. ABŞ və Avropa İttifaqı rəsmiləri Brüsseldə Qarabağ ermənilərinə maliyyə ayıracaqlarını bildirdilər. Bu maliyyənin Qarabağ ermənilərinin Ermənistan cəmiyyətinə inteqrasiya və yerləşməsi üçün ayrılacağı vurğulandı. Elə bizə də o lazımdır ki, Qarabağ erməniləri Ermənistanda qalıb yaşasınlar, çünki onlar geri dönüb Azərbaycan vətəndaşlığını qəbul etmək istəmirlər".

E.Şahinoğlu bildirib ki, Vaşinqton və Brüssel ermənilərin Qarabağa qayıtmayacağı reallığını qəbul edib:

"Beləliklə, ABŞ və Avropa İttifaqı Brüssel görüşü vasitəsilə Ermənistanı himayəsi altına aldığını elan etdi. Brüssel görüşünün əsas nəticəsi budur”.

Becan.az