"Əcnəbiləri gətirib neftin, futbolun başına oyun açırlar"

Xəbər verdiyimiz, kimi futbol üzrə Azərbaycan millisinin yeni baş məşqçisi postuna Fernando Santuşun təyin olunması futbolsevərlər arasında birmənalı qarşılanmayıb.

Bildirilir ki, futbolçu karyerası elə də parlaq olmayan 69 yaşlı mütəxəssisin baş məşqçi kimi hansısa uğurlara imza atacağı o qədər də inandırıcı deyil.

Bakupost.az-a açıqlamasında millət vəkili Aqil Abbas milli komandaya yerli mütəxəssisin təyin olunmasının tərəfdarı olduğunu bildirib:

“Yeni baş məşqçi haqqında heç nə düşünmürəm. Mən istəyirdim ki, milli komandaya yerli məşqçi təyin olunsun. Daha bəsdi, əcnəbi məşqçiləri gətirib Azərbaycan futbolunun da, neftinin də başına oyun açdılar".

O, qarşıdakı illərdə yeni baş məşqçinin fəaliyyətinə qiymət vermək imkanın olacağını bildirib:

"Amma çox güman ki, elə də bir şey edə bilməyəcək. Söhbət məşqçinin yaşından getmir, mənim də 70 yaşım var, amma danışa bilirəm. Söhbət ondan gedir ki, əcnəbidir, mənim xalqımın dilini başa düşmür”.

Qeyd edək ki, AFFA İcraiyyə Komitəsinin (İK) onlayn formatda keçirilən son iclasında İK-nin üzvü və “Qarabağ”ın baş məşqçisi Qurban Qurbanov iştirak etməyib.