"Sən maral, mən maral..." - Zərdüşt Əlizadə Sərdar Cəlaloğlunu "bəzədi"

Növbədənkənar parlament seçkilərinə qatılan Azərbaycan Demokrat Partiyasının (ADP) sədri Sərdar Cəlaloğlu namizədliyini geri götürüb.

Partiya sədri KİV-ə açıqlamasında geri çəkilməsini müxalifət liderlərinin prosesdə iştirak etməməsi ilə əlaqələndirib:

"Mən, seçkidə iştirak qərarı verməklə digər müxalifət liderlərinin də prosesə qatılacağını düşünürdüm. Namizədliyimi irəli sürdüm ki, bu bir nümunə olsun. Lakin onlar seçkidə iştirakdan imtina etdilər. Düşündüm ki, təkbaşına nə edəcəm axı. Meydanda tək qaldım. Bu baxımdan, namizədliyimi geri götürmək qərarına gəldim".

Siyasi şərhçi Zərdüşt Əlizadə isə mətbuata açıqlamasında ADP sədrinin müxalifət liderlərinə qarşı fikirlərini əsassız adlandırıb:

"Sərdar Cəlaloğlunun mandat qazanmaq üçün yarım qəpiklik şansı yox idi. Bu olsaydı, Sərdar bəy heç vaxt geri çəkilməzdi. Bu lap yaralı maralın rəvayətinə bənzəyir. Qurbağa yaralı marala deyir ki, sən maral, mən maral. Maral da deyir ki, mən yaraya dözərəm, amma bu təhqirə dözmərəm, yıxılır ölür. Sərdar Cəlaloğlunun da özünü özündən böyük siyasətçilərlə, yəni partiya sədrləri ilə müqayisə etməsi həmin rəvayətə bənzəyir. Azərbaycanda heç kəs Sərdar Cəlaloğlunun sədaqətinə inanmır. O, Xalq Cəbhəsindən Demokrat Partiyasına keçdi. O da birləşdi Sədaqət Partiyasına. Sonra İlyas müəllimə atıb, ordan da Rəsul Quliyevin partiyasına keçdi. Rəsul Quliyevin hesabına Amerikaya gedib-gəldi. Sonra ona atıb, özü sədr oldu".

Qeyd edək ki, Sərdar Cəlaloğlu namizədliyini 3 saylı Babək-Şahbuz-Kəngərli seçki dairəsindən irəli sürmüşdü.

Becan.az