Türkiyə-Ermənistan sərhədinin açılması sülh sazişindən sonra mümkündür - ŞƏRH

Türkiyə və Ermənistan münasibətlərinin normallaşması üzrə xüsusi nümayəndələr 2 ildən sonra yenidən bir araya gəlib. Onlar bu dəfə üçüncü ölkələrdə deyil, iki ölkənin sərhədində görüşüb.

Tərəflər arasında sonuncu görüş 2022-ci ildə Vyanada keçirilib. Görüş zamanı Türkiyə və Ermənistan arasında quru sərhədinin üçüncü ölkə vətəndaşları üçün açılmasına dair razılıq əldə olunub. Ancaq hələlik bu razılaşma yerinə yetirilməyib.

Budəfəki görüş günün birinci yarısında Ermənistan, günortadan sonra isə Türkiyə tərəfində keçiriləcək.

Görüşlə bağlı Modern.az-a danışan Türkiyə-Azərbaycan parlamentlərarası dostluq qrupunun rəhbəri Şamil Ayrım bildirib ki, Türkiyə və Ermənistan arasında münasibətlərin normallaşmasında Ankaranın əsas şərti Azərbaycanla sülh müqaviləsinin bağlanmasıdır:

“İki ölkə arasında sərhədlərin açılması hələ ki, real görünmür. Azərbaycan tərəfi Ermənistandan konstitusiyanın dəyişdirilməsini tələb edir. Bunu əslində Ermənistanın Baş naziri Nikol Paşinyan da qəbul edir. Amma diaspor və daxili qüvvələr Nikol Paşinyanı bu mövzuda sıxışdırmağa çalışır. Görünən odur ki, Paşinyan da Türkiyə ilə münasibətlərin normallaşmasını istəyir. Bunun Ermənistan və Azərbaycan sülh müqaviləsindən keçdiyini çox yaxşı bilir.

Ermənistan konstitusiyasında Azərbaycan və Tükiyəyə qarşı torpaq iddiaları var. Bu dəyişdirilməlidir. Bunlar olmazsa, normallaşma prosesi ola bilməz. Türkiyə hər an sərhədlərin açılmasına hazırdır. Amma dediyimiz kimi, bu, Ermənistan və Azərbaycan arasında münasibətlər normallaşandan sonra baş verə bilər. Türkiyənin hazırda sərhədləri açmaq kimi niyyəti yoxdur. Cənab Ərdoğanın da dediyi kimi, Azərbaycan məsələsi tam həll olunmazsa, irəliləyiş əldə oluna bilməz. Bu məqamda Ermənistanın Türkiyə kimi ölkəyə ehtiyacı var. Ona görə də Azərbaycan və Türkiyə ilə münasibətləri ciddi şəkildə düzəltməlidir”.