Naxçıvanda atəşkəs İran-İsrail gərginliyinə görə pozulub? - ŞƏRH

Xəbər verildiyi kimi, avqustun 15-i və 16-da Ermənistan Silahlı Qüvvələri Azərbaycan Ordusunun Naxçıvan istiqamətindəki mövqelərini atəşə tutub. Bölmələrimiz tərəfindən qeyd olunan istiqamətdə adekvat cavab tədbirləri görülüb.

Ermənistan yenidən atəşkəsi pozmaqla hansı məqsədi güdür?

Bakupost.az-a açıqlamasında sabiq xarici işlər naziri Tofiq Zülfüqarov ermənilərin Naxçıvan istiqamətində fəallaşmasının bir çox faktorlarla bağlı ola biləcəyini deyib.

O, Ermənistanın daxilində gərginlik əlamətlərinin mövcud olduğunu və bəzi güc strukturlarının baş nazir Nikol Paşinyana qarşı müxalif mövqedə daynadığını bildirib:

“Onların Paşinyanın xəbəri olmadan hansısa addımlar atması istisna olunmur. Yəni, bu addımlar gündəmdədir. Digər tərəfdən, biz görürük ki, gərginlik davam edir. London görüşündən imtina edən Paşinyan başa düşür ki, danışıqlar böhrandadır. Danışıqlarda böhran məsələsi olanda ortaya digər problemlər çıxır. Yəni, güc nümayiş olunması, bərpa olunan dəstəyi yoxlamaq üçün bu cür təxribat xarakterli addımlar atırlar. Onlar İran-İsrail gərginliyi fonunda Ermənistanın istəklərinə maraq itməsin deyə, bu cür təxribatlara cəhd edirlər”.