Enerji - günümüzün valyutası

Günay ƏFSƏR





Biz azad ruhlu insanlar olaraq doğuluruq, lakin böyüdükcə həyatda çalışaraq, əziyyət çəkərək istəklərimizə hüzurlu şəkildə çata biləcəyimizə inandırılırıq. Amma unutduğumuz əsas nüans hər kəsin "özünəxas enerji"si ilə seçilməsi, onun tutumu və keyfiyyətilə həyatda nə qədər irəliləyə bilməsidir.

Hər şey enerji səviyyəsində baş verir və həll olunur.

Enerji - günümüzün valyutası hesab edilən ən dəyərli, ən özəl, xüsusi və görünməz sehirli çubuqdur. O, bizi girdiyimiz ortamda sevdirir, seçdirir və diqqətləri cəlb edir.

Əsas sirr - əziyyətlə, savaş içində çalışaraq qazanmaq deyil, sərf edilən fiziki və əqli eforla yanaşı, enerji keyfiyyəti üzərində zövqlə işləyərək Kainat və İnsanlarla görünməz manyetik sahədə ünsiyyət qurmaqdır. Hansı ki, enerji bizim nə istədiyimizi, hansı düşüncə və layiqlikdə olduğumuzu yansıdan və onları şüuraltı qarşı tərəfə çatdıran əsas alətdir.

Enerji hec zaman yanılmaz, yanıltmaz. Ki, o hər şeyi ələ alır, informasiya toplayır, yayın edərək məlumatı qarşı tərəfə ötürür və bizi ən doğru şəkildə ifadə edir. Yəni, həyat, enerjimiz vasitəsilə və məhz bunun üzərindən bizlərə doğru seçim və qərarlara gedən yolayrıcında kömək etmiş olur. Enerjimiz və intuisiyalarımızla biz bunu duya, beynimizdəki analitik bacarıqla ölçüb-biçərək, xeyirli nəticəyə doğru təslimiyyət içində yola çıxa bilərik.


Şanslar da enerjimiz qədərdir. Və enerjimizin yetdiyi qədərini görə, tuta və doğru yöndə istifadə edə bilirik. Burda bu cür yanaşma tam da yerinə düşər. Hər kəs enerjisinin çörəyini yeyər, enerjisinin taleyini yaşayar bu dünyada.

Enerjinin gücü və yüksək emosiyalarda(sevinc, güvən, sevgi, cəsarət və.s.) var olan biri ən möhtəşəm şəkildə pul, sevgi və insan maqnitinə çevrilər, atdığı addımları ilə hər ortamda parlamağı və ulduz olmağı bacarar.

Gün içərisində enerjimizi alan, onu havaya sovuran əsas nüanslar isə - keçmiş peşmançılıqlar və gələcək qayğılarda itib-batmaq, özümüzə xəyanət edərək, bir çox istəmədiyimiz işlərdə, insanların yanında ilişib-qalmaq, mənasiz neqativ düşüncələrə qapılıb-üzülmək, boş və nəticə verməyən söhbətlər, qınamaq, danlamaq, kimisə alçaltmaqdır. Nəhayətində, bunlar enerji keyfiyyətimizi aşağı salaraq həyat keyfiyyətimizə və ruh halımıza da neqativ təsir etmiş olur.

Enerjisi aşağı olan insanlar isə neqativ hadisə və problemli insanları özünə və ətrafına, fərqinə varmadan, çəkər.

Enerjimizi yüksəltmək və onun keyfiyyətini artırmaqsa, bizə yüksək həyat səviyyələrinə rahatlıqla çıxmağımıza daxilən hazır olmamız deməkdir. Bu isə yalnız yüksək emosiyalarda var olmaq, şükür etmək, xarakterimizə uyğun, sevdiyimiz yaradıcı işlərlə məşğul olmaq, birliyə insanlığa xidmət etmək, hər kəsə yalnız xoş və faydalı olanı arzu edərək, şərtsiz sevgi ilə yaşamaqdan keçər.

Görünməyən, lakin həyatımızın iplərinə sıxca bağlı olan Enerjimizin fərqinə varıb, onu anlamağı, hiss etməyi ən gözəl yöndən yüksəltməyi öyrənək ki, dünyamız yalnız firavanlıq içində var olsun.

Hər daim Enerji və sevgi saçın!

Becan.az