Keçmiş şöbə müdiri nazirliyi "yıxıb sürüdü" - "Biabırçılığı bildiyinə görə müəllimlərin etirazını görmür"

"Azərbaycan dili və ədəbiyyat müəllimlərinin kütləvi etirazına baxmayaraq, testin gizli saxlanılmasının əsas səbəbi mətn üzrə tapşırıqlardır".

Bakupost.az xəbər verir ki, bunu filologiya üzrə fəlsəfə doktoru, Təhsil İnstitunun keçmiş şöbə müdiri Könül Aydın özünün feysbuk hesabında yazıb.

"Əminəm ki, bunkerə yeni "ekspertlər" daxil edilib və onlar çox səriştəsiz iş görüblər. Onlar Çərçivə Sənədindəki qeydi nəzərə almadan 13 mətn sualı əvəzinə, 13 mətn daxil ediblər testə. Ağlı başında olan hər kəs anlayır ki, cəmi 120 dəqiqəlik imtahanda 2 fənn, üstəgəl metodika, pedaqogika sualları var və bunlarla yanaşı 13 mətn tapşırığını həll etmək mümkünsüzdür.

Bu mühüm pozuntudan əlavə, qrammatika suallarının da anlaşılmaz modellər əsasında tərtib olunması narazılıq doğurub. Görünür, yeni ekspertlər öz ağıllarını müəllimlərin üstündə sınağa çəkmək istəyiblər.

Nazirlik bu biabırçılığı bildiyinə görə müəllimlərin haqlı etirazını görməmək üçün əlindən gələni edir", - deyə o, qeyd edib.

Qeyd edək ki, iyunun 18-də keçirilmiş Azərbaycan dili və ədəbiyyat müəllimlərinin sertifikatlaşdırma imtahanınından kütləvi narazılıqlar var. Bir çox müəllimlər sosial şəbəkədə qeyd edirlər ki, imtahan sualları anlaşılmaz və çətin tərtib olunub. Etirazçı müəllimlər elm və təhsil naziri Emin Əmrullayevdən imtahanların yenidən keçirilməsini tələb edirlər.

Onu da diqqətə çatdıraq ki, Elm və Təhsil Nazirliyinə yaxın sayılan təhsil ekspertləri imtahandan narazılıq edən müəllimlərin üzərinə kütləvi hücuma keçərək hətta sosial şəbəkə hesablarında onları təhqir etməkdən çəkinmirlər.