Qayğıdan kənarda qalan Rəfael Ağayevin gileyi və həyat yolundan qısa məqamlar

Karate üzrə 11 dəfə Avropa, 5 dəfə Dünya çempionu olan, Azərbaycanın Olimpiya tarixində karate üzrə ilk medalçısı, "Qara Brilyant" ləqəbi ilə tanınan Azərbaycan karateçisi Rafael Ağayev son günlər Azərbaycan Karate Federasiyasının laqeydliyindən gileylənir.

Sosial şəbəkələrdə diqqətdən kənarda qaldığını bildirən tanınmış idman ustası Rəfael Ağayev bildirib ki, idman sahəsində bu qədər xidmətlərinin olmasına, ölkəyə çox sayda qızıl, gümüş və digər əyarlı medallar gətirməsinə və Azərbaycan gəncliyi üçün idman sahəsində məşqçi kimi həyata keçirtmək istədiyi böyük arzularının olmasına baxmayaraq, hazırda ağrıyan ayağına vurmağa iynə-dərman tapmır. "Qara Brilyant" xüsusilə Azərbaycan Karate Federasiyasının onunla maraqlanmadığını vurğulayıb...

Azərbaycanın idman tarixində dünya səviyyəsində əvəzsiz nailiyyətlərə imza atmış, adını Ginnesin Rekordlar Kitabına yazdırmağı bacarmış karate ustasının son durumundan təəssüflənərək oxucularımıza onun həyat yolu ilə bağlı bəzi məlumatları çatdırmağı özümüzə borc bildik ki, mövcud vəziyyət daha aydın olsun.

Beləliklə:

- Rafael Ağayev 4 mart, 1985-ci ildə Sumqayıt şəhərində anadan olub.

- İlk müəllimi tanınmış karate ustası və məşqçi Rafael Məmmədov olub. Rafael Ağayev bununla bağlı aşağıdakıları qeyd edir:

"Yeddi yaşımda ilk dəfə Brus Li filmlərinə baxdım və dərhal karateyə aşiq oldum. Və atamdan məni karate bölməsinə göndərməsini xahiş etməyə başladım. Atam peşəkar idmançı olub, "Polad" (Sumqayıt) futbol komandasında çıxış edib. O, məndən həqiqətən futbolla yox, karate ilə məşğul olmaq istəyib-istəmədiyimi soruşdu və qəti cavabımı eşidəndən sonra məni ilk məşqçim Rafael Məmmədovla karate bölməsinə apardı".

- O, 2003-2007-ci illərdə Azərbaycan Dövlət Bədən Tərbiyəsi və İdman Akademiyasında ali təhsil alıb.

- Rafael Ağayev fərdi yarışlarda ən çox dünya çempionu olan idmançı kimi Ginnesin Rekordlar kitabına düşüb.

- O, 2020-ci ildə Tokio Yay Olimpiya Oyunlarında finala yüksələrək gümüş medal qazanıb və Azərbaycanın Olimpiya tarixində karate üzrə ilk medalçısı olub.

- Döyüş üslubunun sərtliyi, qətiyyəti və karate texnikasının mükəmməlliyi səbəbilə ona "Qara Brilyant" ləqəbi verilib.

- Onun ən böyük arzularından biri ölkəmizdə karate məktəbi açmaq və orada şəhid övladlarından Avropa və Dünya çempionları yetişdirməkdir.

Azərbaycan karate idman tarixinə böyük şöhrət qazandırmış Rəfael Ağayevə can sağlığı arzulayırıq və ümid edirik ki, idman ustamız aidiyyatı təşkilatlar tərəfindən haqq etdiyi diqqət və qayğını görəcək.

Becan.az