Bəxtiyar Hacıyevin anası: “Onu çətinliklə tanıdım”

İctimai fəal Bəxtiyar Hacıyev 23-cü gündür ki, Bakı 1 saylı İstintaq Təcridxanasında aclıq edir. Bu gün anası Solida Mövlayeva onunla görüşüb.
S.Mövlayeva “Turan”-a oğlunun vəziyyətinin getdikcə pisləşdiyini deyib.

“Gözləri çuxura düşüb, üzü çox solğundur. Onu çətinliklə tanıdım. Əlləri soyuqdur, nəbzi hiss olunmur”, - deyə, o, bildirib.

Anası ictimai fəaldan aclığı dayandırmağı xahiş edib, ancaq, o, imtina edib: “Bəxtiyar dedi ki, mənim heç bir günahım yoxdur, ona görə də azadlığa çıxana qədər aclığı davam etdirəcəyəm”.


Qeyd edək ki, dekabrın 9-da Bəxtiyar Hacıyev xuliqanlıq və məhkəməyə hörmətsizlik ittihamı ilə saxlanılıb. Həmin gün Xətai Rayon Məhkəməsi onu 1 ay 20 gün həbs edib. Dekabrın 15-də Hacıyev həbsdən azad olunması tələbilə aclıq elan edib. İctimaiyyət nümayəndələrinin və ailə üzvlərinin təkidli çağırışlarından sonra, dekabrın 28-də axşam aclığı dayandırıb. Lakin Apellyasiya Məhkəməsi onun həbsilə bağlı şikayətini növbəti dəfə təmin etmədikdən sonra, yanvarın 9-da Bəxtiyar Hacıyev yenidən aclığa başlayıb və bu günədək aclığa davam edir. Yanvarın 21-də məhkəmə Bəxtiyar Hacıyevin həbs müddətini daha 1 ay uzadıb.

Becan.az