Fotobloqçu Vəli Şükürov həbs edilib

Fevralın 5-də Bakının Səbail Rayon Məhkəməsi fotobloqçu Vəli Şükürov barəsində 30 sutkalıq inzibati həbs qərarı çıxarıb. O, İnzibati Xətalar Məcəlləsinin 510 (xırda xuliqanlıq) və 535.1 (polisə tabe olmama) maddələri təqsirli bilinib. Bu barədə Turan-a fotobloqerin həyat yoldaşı Aytac Ələnur məlumat verib.

O, ərinə qarşı irəli sürülən ittihamları əsassız hesab edir.

Ələnurun sözlərinə görə, fevralın 4-də səhər saatlarında Şükürov Binəqədi polisinə çağırılıb.

Şükürov 1 saata yaxın polisdə olub, sonra sərbəst buraxılıb. O, həyat yoldaşının bir polis əməkdaşı ilə bağlı dindirildiyini deyib.

“Üç il əvvəl Vəli bu polis işçisinə bir maşının nömrəsini verib və onun kimə məxsus olduğunu öyrənmək istəyib. Dünən polis idarəsində özü üçün maraqlanıb və maşının sahibi ilə bağlı heç bir yerdə məlumat yaymayıb”, - deyə Ələnur daha sonra bildirib.

Onun sözlərinə görə, Şükürov sərbəst buraxılandan sonra, fevralın 4-də gün ərzində mülki geyimli şəxslər onların evlərinə iki dəfə gəlsə də, əri mənzildə olmayıb.

Axşam saat 21 radələrində Ələnur əri ilə birlikdə evə qayıdarkən, Şükürovu saxlayıblar.

Polis saxlanılmanın səbəbləri ilə bağlı heç bir məlumat verməyib.

Və yalnız fevralın 5-də saat 13:00 radələrində vəkil Zibeidə Sadıqova Şükürovun 30 sutka həbs olunduğunu öyrənə bilib.

Bu qərardan apellyasiya şikayəti veriləcək.

Bloqqerin həyat yoldaşı ərinə qarşı irəli sürülən ittihamları əsassız hesab edir.

“Vəli tamamilə sakit, qanuna tabe olan insadır, ona görə bu ittihamlar inandırıcı deyil. O, polisə cağrılan kimi özü gedib. Onu mənim gözlərim qarşısında saxladılar və Vəli heç bir müqavəmət göstərməyib”, - deyə, Ələnur bildirib.

Qeyd edək ki, Şükürov daha çox səyahət blogeri kimi tanınır və səyahətlərindən fotoları əsasən İnstaqramda paylaşır (https://www.instagram.com/velishukurov_photo).

Vəli Şükürov 2020-ci ilin payızında 44 günlük Qarabağ müharibəsini də işıqlandırıb və onun işi Azərbaycan Tarixi Muzeyində təşkil olunan fotosərgidə təqdim olunub.

Becan.az