Musiqi ilə şeirin vəhdəti bir ürəkdə

Ədəbiyyat / Manşet

17:00 5.01.2023 2 692

Kaman ustası Xəyyam Məmmədovun ədəbi yaradıcılığından bir neçə yarpaq...

Xəyyam Əhrar oğlu Məmmədov 1976-cı il, yanvarın 22-də Cəbrayıl rayonunda anadan olub. Orta təhsilini Cəbrayıl şəhər məktəbində alıb. 12 yaşından kamançanın sirlərini öyrənməyə başlayıb. Orta məktəbin 11-ci sinfində oxuya-oxuya Cəbrayıl musiqi məktəbində kamançadan tədris etməyə başlayıb. Cəbrayılın işğalından sonra Sumqayıt şəhərinə köçən X.Məmmədov, Sumqayıt Musiqi texnikumuna daxil olub. Gənc kamançaçı texnikumda oxumaqla, eyni vaxtda Ü.Hacıbəyli adına Bakı Musiqi Akademiyasına imtahan verərək, qəbul olunub. Ali təhsilini bitirdikdən sonra Azərbaycan Musiqi Konservatoriyasında kamança üzrə müəllimlik fəaliyyətinə başlayıb. Hazırda həm Konservatoriyada, həm də Azərbaycan Dövlət Akademik Flarmoniyasında çalışır.
Uşaq yaşlarından başlayaraq şeirlər yazmağa başlayan Xəyyam Məmmədov, hazırda “X.M.” imzası ilə yazdığı şeirlərlə çoxsaylı oxucu dairəsinin diqqətini cəlb etməkdədir. Əsasən sevgi şeirləri ilə oxucu rəğbəti qazanan şairin müxtəlif mövzularda şeirləri mövcuddur.

Mən elə bilirdim...

Mən elə bilirdim sənin gəlişın
Ömrümə çiçəkli yaz gətirəcək.
Həmişə qəm dolu gələn gecələr
Daha qəm kədəri az gətirəcək...

Mən elə bilirdim gəlişin ilə
Dönəcək, bəxtimin üzü güləcək.
Taleyə yazılan gözəl günlərim
Əgər yazılıbsa, sənlə gələcək...

Mən elə bilirdim sən gələn kimi
Bahar da gələcək güllə, çiçəklə...
Ətirinlə dolacaq dünyam büsbütün,
Qoşa döyünəcəm sevən ürəklə...

Sənin gəlişinlə dəyişər hər şey,
Bitər ayrilıqlar, kədərim, dərdim..
Səndemə yazıya pozu yox imiş,
Mən elə bilirdim... elə bilirdim...

...
Ayrılıb gedirsən sözü yox kimi,
Elə bil o adam heç sən deyildin.
O isti duyğular, o gözəl hisslər
Bu qədər tezliklə keçən deyildi...

Səninçün ötəri hiss imiş demə,
Çox'mu sınamısan könül qırmağı?
Özünə peşə'mi seçmisən gözəl,
Ürək dağlamağı, qəlb sındırmağı...

Əvəzsiz qalmır ki, dünyada heç nə,
Etdiyin qarşına çıxar, darıxma.
Haqqın tərəzisi şaşmaz bunu bil,
Yıxanı gec ya tez yıxar, darıxma...

Sən elə düşünmə asandır hər şey,
İşinə vurulan "pəl" də olacaq.
Özün düşəcəksən mənim günümə,
Yaxandan yapışan əl də olacaq...

Hər şeyin hesabı çəkilər əlbət,
Üzünə bağlanar bir gün qapılar.
Bəlkə öyrənərsən onda sevməyi,
Sənin də könlünü qıran tapılar...

...
Əlimi uzatsam çatar bəlkə də,
Nə qədər yaxınsan, o qədər uzaq.
Bizim alnımıza yazan yazıbee,
Sevgidə əzilək, sınaq, uduzaq...

Əgər gətirmirsə bəxt, ha çabala,
Əlini tutduğun ipi qoparar.
Qismətim dediyin nəyin var isə
Ovcunun içindən alıb aparar...

İndi yaxındasan, beş addımımda,
Yenə görüsumüz aylara qalır.
Bilmirəm başımı ha yana qoyum,
"Ay toba" yuxum da avara qalır...

Tez-tez inciyirsən, tez-tez küsürsən,
Könlünü alıram min qılıq ilə.
Sözümdə saitlər incə deyilsə,
Cəzamı kəsirsən ayrılıq ilə...

Bir az gecikəntək anlayıram ki,
Sənin ürəyinə şübhələr dammış.
Başqa işim gücüm yoxdur dunyada,
Mən səni sevməyə doğulmuşammış...

…
Mən səndən gizlində heç nə etmədim,
Nəyim var qarşında yazılı durur.
Əməlim təyindir tamamlığıma,
Məzarım hardasa qazılı durur...

Sağımı soluma balans etmişəm,
Dörd səhv bir düzumü aparsa neynim.
Ölümün ucuzu tapılan olur,
Yaxamı hər harda taparsa, neynim...

Onsuz da nəfəsim borca yazılır
Canımı əmanət götürmüşəmsə...
Yəqin ki keçərsən diqqətsizliyi,
Hansısa günahı ötürmüşəmsə...

Uzundur imtahan, dözərəm, neynim,
Qısası yandırar əzizlərimi.
Kirli əməllərim gedər mənimlə,
Dünyada qoyuram təmizlərimi...

Səhvimlə düzümlə nəyəmsə, oyam,
Kiminsə cızdığı yolla getmədim.
Tanrım, sən bilirsən, vicdanımdasan,
Mən səndən gizlində heç nə etmədim...

X.M.