"Elçinlə eyni ittihamla tutulmuşduq, o niyə azadlıqdadır?" - Əvəz Zeynallı

Xəbər verdiyimiz kimi, “Xural” internet televiziyasının rəhbəri Əvəz Zeynallı və “Səda TV” MMC-də rəhbər vəzifədə işləyən Elnur Şükürovun cinayət işi üzrə məhkəmə prosesi başlayıb.

APA xəbər verir ki, Bakı Ağır Cinayətlər Məhkəməsində hakim Əli Məmmədovun sədrliyi ilə keçirilən iclasda təqsirləndirilən şəxslərin anket məlumatları dəqiqləşdirilib.
Cinayət işi üzrə dövlət ittihamını Baş Prokurorluğun İttiham İdarəsinin böyük prokuroru Eldar Həmzə müdafiə edir.
Prosesdə həm Əvəz Zeynallının, həm də Elnur Şükürovun vəkilləri bir sıra vəsatətlərlə çıxış ediblər.

Vəkillər təqsirləndirilən şəxslərlə bağlı cinayət təqibinə xitam verilməsini, əks halda isə seçilmiş həbs qətimkan tədbirinin ev dustaqlığına dəyişdirilməsini istəyiblər. Müdafiə tərəfinin digər vəsatətləri isə təqsirləndirilən şəxslərin şüşə qəfəsdən çıxarılaraq müdafiəçilərin yanında əyləşməsi və iclasın tutumu daha böyük olan zalda keçirilməsi ilə bağlı olub.

Təqsirləndirilən Elnur Şükürovun hüquqlarını müdafiə edən Ramil Əliyev bildirib ki, bir ay əvvələ qədər Baş Prokurorluğun İstintaq idarəsinin rəis müavini olmuş, bir müddət əvvəl isə Baş prokuror yanında Korrupsiyaya qarşı Mübarizə Baş İdarəsinin İstintaq İdarəsinin rəisi təyin edilmiş Mehman Hümbətov Elnur Şükürovdan Əvəz Zeynallının əleyhinə ifadə verməsini istəyib.

Həm Elnur Şükürovun, həm Əvəz Zeynallının vəkilləri vəsatət qaldıraraq, Korrupsiyaya qarşı Mübarizə Baş İdarəsinin İstintaq idarəsinin rəisi Mehman Hümbətov barəsində xüsusi qərar çıxarılmasını istəyiblər.

Əvəz Zeynallı sözügedən vəsatətə münasibət bildirərək onunla birlikdə tutulmuş, hazırda ev dustaqlığında olan vəkil Elçin Sadıqovdan danışıb:

“Məni Elçin Sadıqovla birlikdə tutublar, eyni maddələrlə ittiham olunuruq. Bəs indi hardadır Elçin? Niyə tutulmuşdu? Elçin vəkilim olub, mən 15 il onunla fəxr eləmişəm, axırı gəldi belə oldu. Elçin ifadəsində deyib ki, mən danışmaması və yazmaması üçün Rasim Məmmədovun arvadından pul alıb Əvəzə vermişəm. Baş prokurorun müavini Elçin Məmmədov Elçin Sadıqova dedi ki, Əvəzin əleyhinə ifadə ver get, o deyiləni edib getdi. Sonra da onu aradan çıxardılar”.

Prokuror bu məsələyə qısa münasibət bildirərək, Elçin Sadıqovla bağlı cinayət işinin ayrıldığını, hazırda istintaqın davam etdiyini bildirib.

Əvəz Zeynallının Baş Prokurorluğun fəaliyyəti barəsində tənqidi fikirlərini davam etdirməsi prokuror Eldar Həmzənin yenidən reaksiya verməsinə səbəb olub. Prokuror Əvəz Zeynallıya müraciət edərək təmsil etdiyi qurumu təhqir etməkdən çəkinməyə çağırıb.

Prosesin gedişində o da məlum olub ki, ittiham olunan Elnur Şükürovla bağlı cinayət işində Bakının Sabunçu rayon icra başçısı Adil Vəliyev, Suraxanı rayon icra başçısı Əziz Əzizov və Sumqayıt şəhər icra başçısı Zakir Fərəcov şahid qismində tanınıb. Təqsirləndirilən şəxsin qeyd olunan icra başçılarını rüşvət verməyə təhrik etdiyi iddia olunur.

Prokuror qaldırılan bütün vəsatətlərin rədd edilməsini, təqsirləndirilən şəxslərin həbsinin davamına qərar verilməklə cinayət işinin baxışa təyin olunmasını istəyib.

Məhkəmənin qərarı ilə prosesin geniş zalda keçirilməsi ilə bağlı vəsatət təmin edilib. Təqsirləndirilən şəxslərlə bağlı cinayət təqibinə xitam verilməsi və həbs qətimkan tədbirinin seçilməsi ilə bağlı vəsatət isə rədd olunub.
Baş prokuror yanında Korrupsiyaya qarşı Mübarizə Baş İdarəsinin İstintaq idarəsinin rəisi Mehman Hümbətovla bağlı xüsusi qərar qəbul olunması ilə bağlı vəsatət bu mərhələdə baxılmamış saxlanılıb.

İş üzrə baxış iclası aprelin 10-a təyin olunub.

Xatırladaq ki, Baş Prokurorluğun İstintaq idarəsində aparılmış istintaq zamanı Əvəz Zeynalovun ayrı-ayrı şəxslərdən hədə-qorxu gəlməklə, təkrar və külli miqdarda rüşvət almasına, habelə Əvəz Zeynalov və Elnur Şükürovun qabaqcadan əlbir olan bir qrup şəxs halında vəzifəli şəxslərin qərarına təsir etmək məqsədilə nüfuz alveri edərək, pul almaları, xeyli miqdarda pulu dələduzluq yolu ilə ələ keçirmələri, eləcə də, digər şəxsi rüşvət verməyə təhrik etmələrinə əsaslı şübhələr müəyyən edilib.

Əvəz Zeynalova Cinayət Məcəlləsinin 178.2.1, 311.3.2, 311.3.3, 311.3.4, 32.4, 312.2 və 312-1.1 və digər maddələri, Elnur Şükürova isə həmin Məcəllənin 178.2.1, 32.4, 312.2 və 312-1.1 və digər maddələri ilə ittiham irəli sürülüb.