Aprel Şəhidi Toğrul Fərəczadə anılıb - AĞSUDA

2016-cı ilin 4 günlük Aprel döyüşləri hərb tariximizin şanlı səhifələrindəndir. Aprel döyüşləri sübut etdi ki, ermənilərin “keçilməz sədləri” güclü Azərbaycan Ordusu üçün maneə ola bilməz. Digər tərəfdən, Aprel zəfəri Azərbaycan əsgərində özünəgüvəni bir qədər də artırmış oldu və 44 günlük Zəfər Savaşı tarixə həm də Aprel döyüşlərinin davamı kimi düşdü.

Aprel döyüşlərində Xüsusi Təyinatlı Qoşunun dünyanın ən güclü ordularının əsgərlərindən geri qalmayan zabit, gizir və əsgərləri az müddətdə böyük qələbə əldə etsələr də, onlarla Şəhid də verdilər. O qələbə döyüşlərinin şəhidlərindən biri də Toğrul Habil oğlu Fərəczadədir.

Toğrul Fərəczadə Ağsu rayonun yeganə Aprel Şəhidi olmaqla, həm də ailəsinin tək oğlu idi. O, 1993-cü ilin oktyabr ayının 10-da Ağsu rayonunun Bico kəndində anadan olmuşdu. Həqiqi hərbi xidmətini tamamlamamış, XTQ-nin sıralarına qatılmışdı və “gizir” rütbəsinə layiq görülmüşdü. Aprel döyüşləri zamanı yaralı əsgər yoldaşını xilas etmək istərkən, 23 yaşında Şəhidlik zirvəsinə ucalıb.

Şəhid Toğrul Habil oğlu Fərəczadə aprel ayının 9-da uğunda canından keçdiyi torpağa tapşırılıb. Bu gün Onun haqq dünyasına qovuşmasından 7 il ötür.

Hər il olduğu kimi, bu gün də Ağsu rayonunun Bico kəndində Toğrulun böyüdüyü evdə Onun anım mərasimi keçirildi. Tədbirdə rayon İH-nin əməkdaşları, rayon hərbi komissarlığının nümayəndəsi, Toğrulun hərbçi yoldaşları, ictimaiyyət nümayəndələri və kənd sakinləri iştirak etdilər.

Mərasim əvvəlcə Şəhidin kənd kənd qəbiristanlığındakı məzarını ziyarətlə başladı. Çıxışlarda Onun döyüş yolundan və xatirələrindən bəhs olundu, ruhuna dualar oxundu. Sonra mərasim Şəhidin evində davam etdirildi.

Ruhu şad olsun Şəhid Toğrul Fərəczadənin və bütün Şəhidlərimizə Allah rəhmət eləsin, – deyirik, Şəhid valideynlərinə səbr arzulayırıq.


Becan.az