İmişli məktəbindəki biabırçılıq dərindən araşdırılmalıdır - VİDEO

Bu problem yaranmamalı idi, yaranıbsa, cavabdehlər cəzalandırılmalıdır

İmişli rayon Aranlı kənd 1 saylı tam orta məktəbində ayaqyolu olmaması ilə bağlı sosial şəbəkələrdə video paylaşılıb. Videoda müəllimə şagirdlərə bildirir ki, məktəbdə ayaqyolu tikilməyənə qədər, məktəbə gəlməsinlər. Və videoda tualetə getmək istəyən, lakin tualet olmadığından, sobanın yanında dayanıb, ağlayan uşaq da görünür. Müəllimə qeyd edir ki, bir dəfə də video çəkiliş yayımlayıb, lakin nəticəsi olmayıb...

Ürək ağrıdan mənzərədir. Şagirdlər 5-6 saat ərzində təbii təlabatlarını ödəmək üçün olmalı olan yerin yoxluğundan zülüm çəkirlər, o cümlədən cəmiyyətin alisi - müəllimlər!..

Problemin videosu ictimailəşəndən sonra, məsuluyyətli tərəflərdən olan Mil-Muğan Regional Təhsil İdarəsi açıqlama yayır ki, sözügedən məktəbdə 3 sanitar qovşağı var... Doğrudan da məsələ videoda qabardıldığı kimi yox, dövlət qurumunun bildirdiyi kimidirsə, onda, belə çıxır ki, müəllimlərin və şagirdlərin boyunlarına, sadəcə, tərslik düşüb. Amma Mil-Muğan Regional Təhsil İdarəsinin açıqlamasının sonrası müəllimin düz, cavabdeh tərəfin isə yalan danışdığını sövqi-təbiiliyi ilə üzə çıxarır. Rəsmi idarənin açıqlamasının davamında qeyd olunur: “Məktəb qəzalı vəziyyətdə olduğundan, 2023-cü ildə yeni məktəb binasının layihələndirilmə işlərinə başlanılacaq. Bununla yanaşı, məktəb ən qısa müddətdə mümkün olan variantla (mobil sanitar qovşağı və ya digər) təmin ediləcək və məsələ müsbət həllini tapacaq”... Deməli, məktəb binası həm acınacaqlıdır, həm də sanitar qovuşağı "yoxa" çıxıb!

Əsas məsələ budur ki, problem olub, var və ictimailəşəndən sonda məsul qurum açıqlama verərək vəziyyətdən çıxış yolu tapmağa çalışır. Bəs bu vaxtadək aidiyyatı qurumlar məktəb kimi mühüm bir ictimai məkanda ayaqyolunun yoxluğunu niyə nəzərə almayıblar?!. Ordakı müəllimlər, şagirdlər bu millətin, bu dövlətin sakinləri, balaları deyillər?!.

Məsuliyyət daşıyan, lakin məsuliyyətini qulaqardına vuran şəxslər bu məsələnin bu vəziyyətə gəlib çatmasına görə, mütləq cəzalandırılmalıdırlar ki, başqalarına da dərs olsun!

Əhməd

REDAKSİYADAN: Sonda aldığımız məlumata əsasən, çox təəssüf ki, "kresloya" görə, bu vaxtadək məktəbin problemlərini gizlədən direktor, videonu çəkən və yayan Leyla müəllimənin maaşından tutmaqla, üstəlik ona "Töhmət" də verib. Əslində, məktəb direktoru, - postuna olan sevdasından yaranan öz acizliyinin müqabilində, - Leyla müəllimənin cəsarətinə, qeyrətinə "əhsən!" - deyib, ona böyük təşəkkürlər etməli idi. Lakin, əfsuslar olsun ki, direktor bu əməlilə bir daha məktəbi, təhsili, şagirdləri, müəllimləri yox, yalnız öz mənafeyini düşündüyünü ortaya qoyub!..
İnanırıq ki, ölkənin təhsil sahəsinin ali qurumları bu məsələyə ədalətli yanaşacaqlar.
Qarşı tərəflər məsələ ilə əlaqədar fikir bildirmək istəsə, dinləməyə hazırıq.

BECAN.AZ