ABŞ Qarabağda sülhün əldə olunmasında maraqlıdır

Cümə axşamı Dövlət Departamenti bildirib ki, Azərbaycan və Ermənistan arasında sülh prosesində "dərindən iştirak etməyə" davam edir.

"Ermənistan və Azərbaycan arasında, əsasən Dağlıq Qarabağ regionunda hərbi əməliyyatların dayandırılmasının təmin edilməsi dövlət katibi Entoni Blinken üçün əvvəlkitək böyük əhəmiyyət daşıyır", - mətbuat katibinin müavini Vedant Patel bu həftə Bakı və İrəvanda Vaşinqton nümayəndələrinin diplomatik görüşlərilə bağlı "Turan.az"-ın sualını şərh edərkən bildirib.

Bu həftə ABŞ-ın Qafqazda danışıqlar üzrə baş məsləhətçisi Luis Bono, habelə dövlət katibinin köməkçisinin müavini Erika Olson ayrı-ayrılıqda bölgəyə səfər ediblər.

Bakı və İrəvanda danışıqların təfərrüatları ilə bağlı sualın cavabında Patel deyib ki, konkret məlumat verə bilməyəcək. Lakin, o, xatırladıb ki, bir neçə həftə öncə Münhen Təhlükəsizlik Konfransında dövlət katibinin bu ölkələrin (Azərbaycan və Ermənistan) liderlərilə görüşmək imkanı olub.

"Biz bununla məşğul olmağı fəal şəkildə davam etdiririk... Şöbənin digər əməkdaşları ilə yanaşı cənab Bono da bununla məşğul olmağı davam etdirir",- Patel deyib.

Patel “Bu həftə danışıqlardan sonra Ermənistan və Azərbaycan nümayəndələrinin daha bir görüşünü gözləmək olarmı” sualına konkret cavabdan yayınıb:

"Mən, hadisələri qabaqlamayacam, amma əminəm ki, yaxın vaxtlarda sizinlə bölüşmək üçün daha çox məlumatımız olacaq".