Türkiyənin yeni müdafiə naziri kimdir?

Xəbər verdiyimiz kimi, Türkiyə Prezidenti Rəcəb Tayyib Ərdoğan yeni Nazirlər Kabinetinin tərkibini açıqlayıb.

Ərdoğan keçirdiyi mətbuat konfransında yeni dövrdə nazir olacaq şəxslərin adlarını təqdim edib.

Siyahıya əsasən Türkiyənin Müdafiə Nazirliyinə bundan sonra Yaşar Gülər rəhbərlik edəcək. Hazırda Yaşar Gülərin kim olduğu, Türkiyənin yeni müdafiə nazirinin kimliyi gündəm olub. Ölkə.az Yaşar Gülərin dosyesini incələyib.

General Yaşar Gülər ​​son dövrlərdə ən çox araşdırılan şəxslər arasındadır. Gülər ​​Prezidentin 09 iyul 2018-ci il tarixli sərəncamı ilə Baş Qərargah rəisi təyin edilib. Türkiyə Silahlı Qüvvələrində bir çox yerdə xidmət edən Y.Gülər ​​1954-cü ildə Ərdahanda anadan olub. 1974-cü ildə Hərbi Akademiyanı, 1975-ci ildə Döyüş Məktəbini leytenant rütbəsi ilə bitirib.

1975-1984-cü illər arasında müxtəlif birliklərdə Döyüş Komandası və Bölük Komandiri vəzifələrində çalışan general Yaşar Gülər, 1988-ci ildə Silahlı Qüvvələr Akademiyasını bitirib.

Qərargah zabiti kimi, 1986-1988-ci illərdə Daxili Regional Komandanlıqda Əməliyyat rəisi, 1988-1991-ci illərdə Quru Qoşunlarının Təftiş və Qiymətləndirmə Rəhbərliyində Plan Mütəxəssisi, eləcə də 1991-ci ildə 12-ci Piyada Diviziyasının Əməliyyat və Təlim Şöbə Müdirliyi vəzifələrində çalışıb. 1992-1994-cü illərdə Silopidə Daxili Komandan vəzifələrini icra edib.

Briqada generalı rütbəsi ilə 2001-2003-cü illərdə 10-cu Piyada Briqada Komandanlığı vəzifəsində çalışıb və 2005-ci ildə general-mayor rütbəsinə yüksəlib.

General-mayor rütbəsi ilə 2005-2007 illər arasında MEBS Məktəbi və Təhsil Mərkəzi Komandanlığı, 2007-2009 illər arasında isə Gnkur Təhsil şöbəsinin rəisi vəzifəsində çalışıb və 2009-cu ildə general-leytenant rütbəsi alıb.

General-leytenant rütbəsi ilə o, 2009-2010-cu illərdə Xəritəçəkmə Baş Komandanlığı, 2010-2011-ci illərdə 4-cü Korpus Komandanlığı, 2011-2013-cü illərdə Baş Qərargah Kəşfiyyat İdarəsinin rəisi vəzifələrində çalışıb. 2017-2018-ci illərdə Quru Qoşunlarının komandanı, son olaraq isə 09 iyul 2018-ci il tarixli Prezidentin sərəncamı ilə Baş Qərargah rəisi təyin edilib.

Türkiyə Silahlı Qüvvələrinin üstün xidmət medalı və TSQ Şərəf medalına sahib olan general Yaşar Gülər ​​bəzi ölkələr tərəfindən da müxtəlif medallarla təltif olunub.

Demet Gülərlə evli olan general Yaşar Gülərin bir övladı və iki nəvəsi var. O, ingiliscə səlis danışır.