"Zorakılığa boyun əyməyəcəyik"

Çinin müdafiə naziri Li Şanfu son illər gərginləşən ABŞ-Çin münasibətlərindən danışıb.

Xarici KİV xəbər verir ki, o, Çin və ABŞ-ın birlikdə böyüməsi üçün dünyanın kifayət qədər böyük olduğunu vurğulayıb.

Müdafiə nazirinin sözlərinə görə, Çin və ABŞ fərqli sistemlərə malikdir. Lakin bu, tərəflərin qarşılıqlı əlaqələri inkişaf etdirmək və əməkdaşlığı dərinləşdirmək üçün ümumi dil və maraqlar tapmalarına mane olmamalıdır. Nazir iki ölkə arasında hər hansı münaqişənin dünya üçün dözülməz bir fəlakətə səbəb olacağı barədə xəbərdarlıq edib.

ABŞ-ın müdafiə naziri Lloyd Ostin də Çinlə yeni bir soyuq müharibə istəmədiklərini ifadə edib:

"Biz münaqişə və qarşıdurma axtarmırıq, lakin təzyiq və zorakılığa boyun əyməyəcəyik. Pekin beynəlxalq hava məkanında qanuni olaraq uçan ABŞ və müttəfiqlərinin təyyarələrinə qarşı narahatedici addımlar atır. Buna görə də biz zorakılığa və zülmə qarşı mübarizədə müttəfiqlərimizi və tərəfdaşlarımızı dəstəkləyəcəyik”.

Xatırladaq ki, Çin 2018-ci ildən bəri Rusiyanın silah ixracatçısı “Rosoboroneksport”dan döyüş təyyarələri və avadanlıq aldığına görə ABŞ-ın sanksiyaları ilə üzləşib. ABŞ və Çin arasındakı münasibətlər müxtəlif problemlər, o cümlədən, Tayvan, Cənubi Çin dənizi və prezident Co Baydenin yarımkeçirici çip ixracına qoyduğu məhdudiyyətlər səbəbindən gərginləşməkdə davam edir.