Türk dövlətlərinin polisləri Qarabağda... - Ola bilər

"Danışıqlar prosesində baş verənlərin mahiyyətini tezislərdə ifadə etmək üçün daha bir cəhd:

- Azərbaycan münaqişəyə son qoymaq və istəyənlərə vətəndaşlıq verməklə onları inteqrasiya etmək istəyir;

- Ermənistan istəyir ki, Azərbaycan 1975-ci il sərhədlərini tanısın və bununla da öz təhlükəsizliyini təmin edib, Qarabağa ərazi iddiasını, beynəlxalq birliyin iştirakı ilə ermənilərin “hüquq və təhlükəsizliyi” mövzusunda tələblərini davam etdirsin.

- bütün keçmiş “həmsədrlər” və İran münaqişənin regionun idarə olunmasının sınaqdan çıxmış üsulu kimi davam etməsini istəyir".

Bakupost.az xəbər verir ki, bunu sabiq Xarici İşlər naziri Tofiq Zülfüqarov bildirib.

Onun sözlərinə görə, Azərbaycan Ermənistanın və xarici “oyunçuların” münaqişəni davam etdirmək istəyini görüb, “güzgü effekti” prinsipindən istifadə edərək, “Qərbi Zəngəzur və Göyçə mahalı”, eləcə də “Qərbi Azərbaycan icmaları” mövzusunu irəli sürür:

"Buna görə də Azərbaycan:

- 1975-ci il xətti üzrə sərhədlərin müəyyən edilməsinə getməyəcək. 1920-ci ilin payızına qədər mövcud olan təmas xəttində israrlı olacaq;

- siyasi və müdafiə potensialının üstünlüyünü nəzərə alaraq, Azərbaycan münaqişə zonasını Qərbi Zəngəzur ərazisi və ondan kənara qədər genişləndirməyə hazır olacaq;

- Rusiya reinteqrasiya prosesinə qarşı çıxacağı təqdirdə, hətta 2025-ci ilə qədər sülhməramlı qüvvələrin Türk Dövlətləri Təşkilatına üzv ölkələrin təşkil edəcəyi polis missiyası ilə əvəzlənməsi prosesinə start verilə bilər".

Sonda T.Zülfüqarov qeyd edib ki, Türkiyə mətbuatının yazdığına görə, təkcə İran ərazisindən Ermənistana gətirilən və çatdırılması gözlənilən Hindistan silahlarının həcmi 750 milyon dollara çatıb.