Qubad İbadoğluna görə tutulan Fazil Qasımov haqqında

Xəbər verdiyimiz kimi, Türkiyədə yaşayan azərbaycanlı alim Fazil Qasımov Azərbaycana gətirilərək, saxlanılıb.

Xəbər verilir ki, İstanbul şəhərində yaşayan Fazil Qasımov Türkiyənin Özyeğin və Hollandiyanın Tilburq Universitetində Beynəlxalq Biznes İdarəçiliyi ixtisası üzrə təhsil alıb.

Daha sonra təhsilini Türkiyənin İstanbul Universitetində doktorantura pilləsi üzrə davam etdirib. Hüquq və iqtisadiyyat üzrə fəlsəfə doktorudur.

Xatırladaq ki, rəsmi məlumata görə, cinayət işi ilə əlaqədar axtarışda olan F.Qasımov saxlanılıb, ölkəyə gətirilərək DİN əməkdaşları tərəfindən istintaqa təhvil verilib.

Fazil Qasımovun Qubad İbadoğlunun işi ilə əlaqədar saxlanıldığı bildirilir.

Qeyd edək ki, 15 gün əvvəl Azərbaycan Demokratiya və Rifah Partiyasının sədri Qubad İbadoğlu Cinayət Məcəlləsinin 204.3.1 (saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham olunaraq həbs edilib. Nərimanov Rayon Məhkəməsinin qərarı ilə onun barəsində 3 ay 26 gün müddətinə həbs qəti-imkan tədbiri seçilib.(Musavat.com)