İstedadı hara atsan, göyərəcək...

Sonradan bir çox filmlərin ssenari müəllifi olan Orxan Fikrətoğlu hələ 1991-ci ildə gənc yaşlarında Ramiz Əzizbəyli və Vaqif Səmədoğluyla birgə sevə-sevə izlədiyimiz "Bəxt üzüyü" filminə ssenari yazıb. İnanıram ki, ölkəmizin və dünyanın mədəni aləminə bələd olan "köhnə azərbaycanlı"mız kinomuza yeni nəfəs gətirəcək.

Facebook səhifəsində son paylaşımında Azərbaycan kinosunun yeni mərhələyə addımladığından söz açan sənətkarımıza bu yolda uğurlar diləyirik.

Orxan FİKRƏTOĞLU yazır:

"Bu festivalın tamam yeni məzmunda təşkil edilməsi Mədəniyyət Nazirliyinin yeni komandasının, durğun "kino sularında" müəyyən gəlirli taxça tutanlara, Qərbin sifarişli buyruqlarlı ilə film çəkənlərə real mesajıdır.

Azərbaycan kinosu tamam yeni formatda milli məzmunda və sənaye olaraq yeni münasibətlər zəminində təşkilatlanır:

1.Bu ildən ölkə ərazisində fəaliyyət göstərən bütün kino məktəblərində təhsil alan sonuncu kurs tələbələrinə film çəkmək imkanı yaradırıq;

2.Prodyuser kursları açırıq;

3.Sexdə mövcud olan kadr potensialını müsabiqə yoluyla seçilmiş filmlərin çəkilişlərində məşğul edəcəyik;

4.Anima, Doku və kiçik həcmli fimlər festivalını təşkil edirik, milli platformalarını yaradırıq;

5."Qorqud ATA" festivalını təşkil edirik;

6.İllərlə çəkilməli olan filmləri istehsalata buraxırıq;

7.Qanunuvericiliyin dəyişdirilməsi, əqli mülkiyyət hüquqlarının qorunması ilə bağlı əməli iş görürük;

8.Və ən başlıcası, kino bazarını və onun milli məzmununu yaradırıq".

Orxan Fikrətoğlunun beyni yaradıcılıq kanıdır. Çox ümid edirəm ki, onun Azərbaycan mədəniyyət sahəsində əsas söz sahiblərindən birinə çevrilməsi mədəniyyətimizin inkişafında yeni yolların açılmasına, xüsusən kinomuzun əzəli şöhrətinə qovuşmasına geniş imkanlar yaradacaq.

Bəhruz MƏMMƏDOV,
Jurnalist.
Becan.az