Azərbaycanın tanınmış aktyoru vəfat etdi - FOTO

Azərbaycan Respublikasının Əməkdar artisti, Sumqayıt Dövlət Dram Teatrının quruluşçu rejissoru və aktyoru Namis Şirməmmədov dünyasını dəyişib.

Dünən axşam saatlarında Sumqayıt şəhərində yaşadığı evdə N.Şirməmmədovun səhhəti qəflətən pisləşib. Aktyor Təcili Tibbi Yardım briqadasının köməyi ilə Sumqayıt şəhər Təcili Tibbi Yardım Xəstəxanasına çatdırılsa da, onun həyatını xilas etmək mümkün olmayıb. Əməkdar artist xəstəxanada dünyasını dəyişib.

Namis Xanmirzə oğlu Şirməmmədov 1962-ci ildə Ağsu rayinunun Bico kəndində ziyalı ailəsində dünyaya gəlib. 1979-cu ildə, o, Mədəniyyət və İncəsənət Universitetinə daxil olub. Universiteti bitirdikdən sonra, 1983-cü ildə təyinatla Sumqayıt Dövlət Dram Teatrına göndərilən Namis Şirməmmədov 1989-cu ildə kurs rəhbəri, Xalq artisti, Dövlət Mükafatı laureatı, görkəmli sənətkar Həsənağa Turabovun dəvəti ilə Akademik Milli Dram Teatrının truppasına qatılıb. 1996-cı ildən sonra isə yenidən Sumqayıt teatrına qayıdıb.

Psixoloji-dramatik oyun tərzi ilə böyük uğur qazanmış Əməkdar artist quruluşçu rejissor kimi də maraqlı tamaşalar ərsəyə gətirib.

Bədii filmlərdə və seriallarda çeşidli obrazlar yaratmış Namis Şirməmmədov 62 yaşında bu dünyadan köç etdi.

Aktyorla vida mərasimi bu gün keçiriləcək.

Allah rəhmət eləsin!


Becan.az