Nanə təbii məlhəmdir - istifadə edin, faydasını görün!

Nanə otu çox zəngin kimyəvi tərkibə malikdir. Burada müxtəlif vitaminlər (B qrupu, C. PP), makro- və mikroelementlər, efir yağları və s. faydalı maddələr var.

Nanə həm xalq, həm də ənənəvi təbabətdə geniş istifadə olunur. Bu bitkinin əsasında müxtəlif sakitləşdirici, spazmolitik, köp əleyhinə dərman preparatları hazırlanır.

Nanə çox təsirli sakitləşdirici vasitədir. Məhz bu səbəbdən, nanəni uşaqlar və böyüklər üçün olan müxtəlif sakitləşdirici vasitələrin tərkibinə daxil edirlər.

Nanənin digər faydaları:

- Nanə əhval-ruhiyyəni və beyinin fəaliyyətini yaxşılaşdırır, sakitləşdirir, yuxunu normallaşdırır, baş ağrılarını aradan qaldırır, arterial təzyiqi aşağı salır. Əgər başınız ağrıyırsa, gıcgahlarınıza nanənin efir yağını çəkin;

- Yuxusuzluqdan əziyyət çəkən insanlar hər axşam yatmazdan əvvəl nanə çayı içə bilərlər (1 çay qaşığı quru və ya 1 xörək qaşığı təzə nanə yarpaqları + 1 stəkan qaynar su. 1 çay qaşığı bal da əlavə etmək olar). Bal çayın təsirini daha da artıracaq;

- Nanə həzm sistemi üçün də çox faydalıdır. Nanə köplə yaxşı mübarizə aparır və bu səbəbdən körpələr üçün olan bir çox köp əleyhinə preparatların tərkibinə daxil edilir. Bundan əlavə, nanə mədə şirəsinin və ağız suyunun ifrazını stimullaşdırır, həzm proseslərini yaxşılaşdırır, ödqovucu təsirə malikdir;

- Mikrobəleyhinə təsirə malik olan nanə mədə-bağırsaq sistemində yaşayan ziyanlı mikroorqanizmlərlə mübarizə aparır, ishal zamanı kömək edir;

- Ürəkbulanması zamanı nanə ilə konfetlər və ya nanə dəmləməsi çox yaxşı təsiredicidir;

- Fitonsidlərlə zəngin olan nanə antiseptik, mikrob və iltihabəleyhinə təsirlərə malikdir. Soyuqdəymə zamanı nanə çayı için. Nanənin efir yağı ilə inhalyasiyalar zökəm, öskürək, bronxit zamanı yaxşı kömək edir. Bunun üçün enli qaba qaynar su töküb, içinə 3-5 damcı nanənin efir yağını damızdırın. Buxarla 5 dəqiqə ərzində dərin nəfəs alın. Diqqətli olun ki, selikli qişalar yanmasın;

- Ağız boşluğu və damaqların iltihabları zamanı ağız boşluğunuzu nanə dəmləməsi ilə tez-tez qarqara edin;

- Nanə həm də qadın otu sayılır. Nanə dəmləməsi menstruasiyadan əvvəl və menstruasiya zamanı qadınları narahat edən ağrı və spazmları azaldır, klimaks zamanı qadınlara kömək edir;

- Nanə kosmetologiyada da geniş istifadə olunur. Nanə dəmləməsi ilə olan isti və soyuq kompreslərin növbələşməsi üz dərisini daha elastik edir, cavanlaşdırır. Bunun üçün pambıq salfeti əvvəl isti dəmləmədə isladın və 2-3 dəqiqə ərzində üzünüzdə saxlayın, daha sonra isə soyuq dəmləmədə saxlayın və yenə də 2-3 dəiqiqə ərzində üzünüzdə saxlayın. Bunu 2-3 dəfə edin (axırıncı soyuq kompres olmalıdır);

- Nanə dəmləməsi üz dərisində olan iltihabları azaldır, saçlar üçün də çox xeyirlidir. Saçlarınızı yuduqdan sonra, yaxşı süzülmüş nanə dəmləməsi ilə yaxalayın və qurudun;

- Nanə dəmləməsi ilə həmçinin ayaq vannaları etmək olar. Belə vannalar göbələk infeksiyası ilə mübarizə aparır, xoşagəlməz iyi aradan qaldırır.

İnsan orqanizmi üçün çox faydalı olan bu bitkidən düzgün istifadə etsəniz, nəticəsini görəcəksiniz. Ancaq unutmayın ki, qədərindən artıq hər şey zərərlidir.

Becan.az