Bəxtiyar Hacıyevin səhhəti ağır olaraq qalır

"Bəxtiyar Hacıyevin səhhəti çox pisdir", - bu barədə Turan-a vəkil Aqil Layıc bazar ertəsi 1 saylı Bakı İstintaq Təcridxanasında fəalla görüşdükdən sonra bildirib.

Onun sözlərinə görə, Hacıyevin çəkisi 68,3 kq-a qədər azalıb, nəbzi dəqiqədə 68-dir, arterial təzyiqi isə stabil-aşağı olaraq qalır.

"Həkimlər ona məcburi olaraq sistem qoşmaq istəyiblər, amma o, qəti şəkildə imtina edib. Bəxtiyar huşunu itirənə qədər heç kimin onun orqanizminə müdaxilə etmək hüququna malik olmadığını deyib",- deyə, Layıc bildirib.

Bazar günü Ombudsman Aparatının nümayəndələri Müalicə Müəssisəsində Hacıyevə baş çəkiblər. Onlar arasında həkim və psixoloq da olub. Hacıyev onlara bildirib ki, azad edilənə qədər aclığı dayandırmayacaq.

Müdafiə tərəfi Hacıyevin ev dustaqlığına köçürülməsi haqqında yenidən vəsatət verib.