Bəxtiyar Hacıyev 47 gündür aclıq edir

Cümə günü vəkil Zibeydə Sadıqova Penitensiar Xidmətin müalicə müəssisəsində ictimai fəal Bəxtiyar Hacıyevə baş çəkib.

"Bəxtiyar 47-ci gündür ki, aclıq edir və onu dayandırmaqdan imtina edir", - Sadıqova Turan.az-a bildirib.

Vəkil daha sonra qeyd edib:
"Bəxtiyar Hacıyev ürəyindəki ağrıdan və qollarının keyiməsindən şikayətlənir. 64 kiloqrama qədər arıqlayıb, qanda şəkərin səviyyəsi 5.1 faizə düşüb, qan təzyiqi isə 95/65-dir.
Aclığı dayandırmaqla bağlı təkidli xahişlərimə cavabında, Bəxtiyar dedi ki, sona qədər gedəcək".

Xatırladaq ki, dekabrın 9-da Bəxtiyar Hacıyev xuliqanlıq və məhkəməyə hörmətsizlik ittihamı ilə saxlanılıb. Həmin gün Xətai Rayon Məhkəməsi onu 1 ay 20 gün həbs edib.

Dekabrın 15-də Hacıyev həbsdən azad olunması tələbilə aclıq elan edib. İctimaiyyət nümayəndələrinin və ailə üzvlərinin təkidli çağırışlarından sonra, dekabrın 28-də axşam aclığı dayandırıb. Lakin Apellyasiya Məhkəməsi onun həbsilə bağlı şikayətini növbəti dəfə təmin etmədiyindən, yanvarın 9-da Bəxtiyar Hacıyev yenidən aclığa başlayıb və indiyədək davam etdirir.

Yanvarın 21-də məhkəmə Bəxtiyar Hacıyevin həbs müddətini daha 1 ay uzadıb. Fevralın 23-də isə Xətai məhkəməsi həbs müddətini daha 2 ay - aprelin 28-dək uzadıb.