ABŞ-dan Bakı və İrəvana böyük heyət gəlir - "Past"

Yaxın vaxtlarda Qərbin böyük nümayəndə heyəti regiona səfər etməyi planlaşdırır.

Bakupost.az xəbər verir ki, bu barədə Ermənistanın “Past” qəzeti öz mənbələrinə istinadən bildirib.

"Söhbət ABŞ Dövlət Departamentinin Cənubi Qafqaz regionu üzrə nümayəndələrinin geniştərkibli səfərindən gedir. Onlar İrəvan və Bakıya səfər etməyi planlaşdırırlar. Əldə etdiyimiz məlumata görə, səfərin əsas məqsədi regionda mövcud vəziyyəti yerindəcə dəyərləndirməkdir", - deyə, "Past" yazır.

Qəzet Ermənistan Xarici İşlər Nazirliyindəki mənbəyə istinadən bildirib ki, Qərb, xüsusən də Vaşinqton Aİ-nin Cənubi Qafqaz üzrə xüsusi nümayəndəsi Toivo Klaarın hesabatını, eyni zamanda Gürcüstandakı böhranla bağlı məlumatları qaneedici saymır:

"Dövlət Departamenti Cənubi Qafqazdakı durumla bağlı məlumatları ilkin mənbədən əldə etməyi məqsədəuyğun hesab edib. Nümayəndə heyəti yerində həll yolları tapmağa çalışmağı və vəziyyətdən asılı olaraq gələcək danışıqlar üçün hazırlıq işlərinə başlamağı planlaşdırır. Mənbəmiz onu da bildirir ki, Vaşinqton üçün bu səfər, ilk növbədə, gegionda öz mövqelərini gücləndirmək, Rusiyanın mövqelərini isə zəiflətmək, eləcə də Aİ müşahidəçilərinə əlavə “kart-blanş” vermək baxımından əhəmiyyətlidir”.