"Saxta diplom alanlar da məsuliyyətə cəlb olunmalıdır"

"O vaxt Ali Attestasiya Komisiyyası yox idi. Onu ilk dəfə 1992-ci ildə mən yaratdım. Ona qədər mənə xəbərlər gəlirdi ki, elm adamları gedib Moskvadan 2-3 minə diplom alırlar. Bunun qarşısını almaq üçün Azərbaycanda Ali Attestasiya Komitəsi yaratdıq. Elçibəy də ora bir adam təyin etdi və o şəxs mənim bəyənmədiyim biri olsa da, ömründə rüşvət alan adam deyildi ki, kimsə ona rüşvət versin, saxta diplom alsın və s. Bu kimi neqativ hallar ola bilmzədi. Ləyaqətsiz, haqq etməyən heç kəsə diplom verilmirdi, buna qarşı çıxırdım. Qurum birbaşa prezidentə tabe idi. İndi saxta diplom verənləri ortaya çıxarıblarsa, mən bu əməliyyatı yalnız alqışlaya bilərəm".

Bu sözləri Yenisabah.az-a açıqlamasında sabiq təhsil naziri, professor Firudin Cəlilov deyib. Keçmiş nazir Baş prokuror yanında Korrupsiyaya qarşı Mübarizə Baş İdarəsinin Ali Attestasiya Komissiyasının mütəxəssis-eksperti Şəfa Əliyevi saxlamasını təqdir etdiyini bildirib. Qeyd edib ki, saxta diplomların verilməsinə kim imza atıbsa, onların hamısının adları açıqlanmalıdır:

"Millət görsün ki, ziyalı kimi tanınan insanlar nə işlərlə məşğul olurlar. Mən bunun ifşa edilməsinin tərəfdarıyam və alqışlayıram. Əslində, bu günün özündə belə saxta diplomlar verilir. Çünki layiq olmayan insanlar bir də baxıb, görürsən ki, gəlib olur professor, akademik. Amma ömrü boyu elm uğrunda canını qoyanların qarşısına əngəllər törədirlər, bilərəkdən gənclərin elm dalınca getməsinə maneə olurlar, əlavə sədlər və gərəksiz tələblər qoyurlar ki, gənclərin çoxu elm dalınca getməsin. Əgər bu işləri araşdırıb, günahkarları ortalığa çıxarsalar, mən onlara ancaq sağ ol deyərəm.

O ki qaldı saxta diplom alanların ifşasına, əlbəttə, onların aldığı elmi dərəcələr ləğv olunmalıdır. Əgər sübut olunursa ki, bu adam müdafiə etmədən diplom alıb, bu, cinayətdir və məhkəməlikdir. Hətta, həbs olunmağa qədər o adama cəza düşür, nəinki diplomun ləğvi. Eləcə də, ona diplom verən də məsuliyyətə cəlb olunmalıdır”.