Çörəyin qiyməti yenidən dəyişə bilər - AÇIQLAMA

Məlum olduğu kimi, ölkənin bir sıra ticarət şəbəkələrində 650 qramlıq "zavod çörəyi"nin qiyməti 60 qəpikdən 55 qəpiyə düşüb. Buna səbəb kimi unun topdansatış qiymətlərinin aşağı düşməsi göstərilir.

Mövzu ilə bağlı iqtisadçı ekspert Akif Nəsirli bildirib ki, hazırda dünya bazarında taxıl qıtlığı yaşanmır, bolluqdur:

"Məsələn, son bir neçə ayda Azərbaycan üçün əsas idxal bazarları olan Rusiya və Qazaxıstanda ərzaqlıq buğda ucuzlaşıb. Rusiya buğdası ənənəvi olaraq idxalımızda böyük paya sahibdir. Qonşu ölkədə taxıl məhsullarının qiymətinin düşməsi bizim bazarda unun ucuzlaşması ilə müşayiət olunur".


“Azərbaycanda ərzaqlıq buğdanın, unun və çörəyin qiyməti tənzimlənən tariflər əsasında deyil, bazar iqtisadiyyatı prinsiplərinə uyğun olaraq tələb-təklif əsasında və ərzaqlıq buğdanın dünya bazarındakı qiymətlərinə uyğun olaraq formalaşır. Bir vaxtlar 50 kiloqramlıq un kisəsinin qiyməti 40 manat idisə, indi bu qiymət 26-27 manat arasında dəyişir. Əgər un kisəsinin qiymətində14 manat fərq yaranıbsa, bu da təbii ki, çörəyin qiymətinə təsirsiz ötüşməyib. Təsadüfi deyil ki, son bir ildə “zavod çörəyi”nin qiyməti hər dəfə 5 qəpik olmaqla 3 dəfə ucuzlaşıb".

Ekspert qeyd edib ki, “zavod çörəyi”nin maya dəyəri 30 qəpik ətrafındadır:

“Bizim hesablamalarımıza görə, çörəyin kiloqramı 1 manata başa gəlir, amma bu, qiymətin yarısına təklif olunmalıdır. Axı yayın ortalarına qədər buğdanın qiyməti yarıbayarı düşdü. Bizim bazarda un da baha satılır və onunla buğda arasında qiymət fərqi demək olar ki, iki dəfədir”.

İqtisadçı ekspert Xalid Kərimli qeyd edib ki, hazırda dünyada taxıl bolluğu müşahidə olunur. Bu da təbii olaraq un və un məhsullarının, o cümlədən də çörəyin qiymətinə təsir göstərir, ucuzlaşma olur:

“Hələ ki, ölkənin un və çörək bazarında qiymət ucuzlaşması müşahidə edirik. Lakin Rusiya-Ukrayna müharibəsi səbəbindən Ukrayna taxılının dünya bazarına çıxarıla bilməməsi sonrakı aylarda taxılın qiymətinin bahlaşmasına səbəb olacaq”.(Bakupost.az)